Entama l’actividá pedagóxica del Centru de l’Asturianada

El Centru Diamantina Rodríguez entamó la inscripción de los sos primeros cursos; ún de cantu a cargu de la Mapi Quintana y un taller de poesía na canción asturiana col escritor Xuan Bello.

El primer de los cursos ye de cantu y téunica vocal pa cantantes de tonada, a cargu de la cantante Mapi Quintana. Esti cursu entamará’l 13 de marzu y tien una duración de 20 hores.
 
El segundu ye un taller de poesía en canción asturiana, de la mano de Xuan Bello, que dará entamu tamién el 13 de marzu col mesmu númberu d’hores. Un cursu dedicáu a ellaborar lletres pa da-y puxu a la llamada “tonada renovada” y estudiar les modalidaes poétiques emplegaes na canción asturiana.
 
Con estos cursos, de los que yá ta la matricula abierta, el Centru d’Estudios de l’Asturianada Diamantina Rodríguez de Mieres entama la so actividá pedagóxica, yá qu’hasta’l momentu centraren el so desendolcu na documentación, investigación y dixitalización d’archivos.