Reclamen el fin de la discriminación de llingües énte'l castellán

Los sindicatos de trabayadores de la enseñanza fixeron públicu en Valencia un manifiestu nel que denuncien la "inxusta discriminación" de les sos respectives llingües énte'l castellán.

Comunidá Valenciana, Cataluña, Isles Baleares, Galicia, País Vascu y Navarra apuesten por unir efuerzos en favor de "continuar el llabor de normalización llingüística entamada dende'l final de la dictadura".

Los representantes de los sindicatos aconceyaron esta mañana na sede del Stepv na capital valenciana nuna sesión na que s'aprobó'l manifiestu y acordaron propuestes de trabayu conxuntu pa "promover la normalización llingüística". La creación d'un espaciu virtual compartíu y la organización d'un seminariu sobre "llingües nacionales" son dalgunes d'elles.
  
Estes entidaes critiquen nel manifiestu la "evidente discriminación xurídica" de les llingües autonómiques, qu'ocasiona una "grave desventaya pa la xeneralización de las o conocencia y usu, y señalen que los respectivos procesos de recuperación llingüística entamaos "han dirixise a reestablecer los usos normales y históricos que tuvieron la llingua catalana, vasca y gallega nel senu de les sos sociedaes hasta que, por razón dela fuerza, va imponiéndose'l castellán como única llingua oficial del Estáu".  
  
Defenden amás que les persones "puean exercer el so derechu a espresase y ser atendíos na so propia llingua en tolos espacios públicos" de los territorios onde "son propies" y afirmen que "si nun s'asegura una conocencia xeneral del gallegu, vascu o catalán ye imposible" que los ciudadanos que falen estes llingües "puean vivir col so idioma nos territrios nos que son llingua propia" a diferencia de los castellanofalantes.
  
El testu apoya los programes educativos que tienen como oxetu que'l "alumnáu llogre una bona competencia comunicativa na so llingua propia y lu prepare pa un mundu multillingüe, independientemente de que seya la llingua familiar", frente al monollingüismu español qu'allabancien algunos grupos de presión o les actuaciones d'algunos gobiernos".
  
A lo último, establez que los sindicatos comprométensen a afondar nel so trabayu común pa "algamar la normalización del catalán, gallegu y vascu". Nesti sen, señala que "promoverán la so participación nes redes y plataformes d'apoyu a les llingües nacionales, dotaránse d'espacios d'intervención conxunta y aconceyarán añalmente por intercambiar información y acordar estratexes comunes dirixíes a algamar los sos oxetivos".