Lluis A. Muñiz Antuña; "N’asturianu afáyome como en ca güelu"

Lluis Armando Muñiz, (La Felguera, 1957) yá tien coses escrites en "El Glayíu", revista de Conceyu Bable. Ye l'autor de “El Xanu’l Caborniu”, el recién ganador del Premiu al Meyor Blogue 2009.

¿Qué significa esti premiu pa ti?, ¿víeste ganador?
 
Ye’l mayor reconocimientu que tuvi depués de llevar una carrapotada d'años escribiendo nesta llingua. Toi peragradecíu a la bloguesfera por faceme visible con esti premiu, anque nun hai que tomar esto en sentíu lliteral, el concursu ye una manera de rellacionanos ente blogueros onde influyen motivos de toa frasca a la hora de votar y soi'l primeru que sabe qu'hai blogues meyor que'l míu. Y nun me vía nin de ganador nin siquiera nel podium. Y dígolo daveres y ensin recurrir a esa manera de pedantería que ye la falsa modestia.

¿Cómo te dio por entamar un blogue n'asturianu? ¿cuándo y cómo ñació'l xanu'l caborniu?
 
El Xanu'l Caborniu ñació n'avientu del añu 2007. Depués de llevar abondos años escribiendo  entamé a ablayar y cansar. Asina qu'abandonare dafechu la xera d'escritor. Hasta qu'un día escuqué na bloguesfera y entróme'l rixu por probar nun mediu diferente. Nacieron entós dos blogues, y ún d'ellos ye'l d'esti xanucu echáu al monte.
 
¿Y cuándo entamasti a escribir?
 
Recuerdo cuantisimayá tener ganaos tres concursos lliterarios de poesía qu'entamaben allá pelos 80 na fiesta "Les Cebolles Rellenes" de L'Entregu. Tengo delles coses publicaes, pero espreganciaes per abondos boletinos de l'Academia de la Llingua, polo que siguir esto ye xera d' héroes. Asina que toi recopilando parte d'esi trabayu en versu de toos esos años y dalgunes coses nueves nel blogue "El Copilotu de Pinín".

¿De que fales nel to blogue y qué t'emotiva a la hora de ponete a escribir?
 
Per un llau, trato cuestines que cinquen a la política y fechos de toa mena qu'acontecen nel nuestru país, y per otru, acordies col personaxe, amazcárome de druida que llanza mensaxes llamando a la defensa de lo ferial asturiano y al arguyu por pertenecer a esta nación yá milenaria. Tamién escribo dacuando coses pa sofitar el movimientu nacíu de la web Pola Xuntanza, onde figuro como blogueru d'apoyu. Escribo simplemente porque m'afayo como en ca güelu espresándome n'asturianu, yá que ye la mio llingua de nacencia. Préstame a embute reconoceme usando les sos pallabres y espresiones, la so bayura espresiva, y ver ya interpretar el mundu al traviés d'esti idioma que nos tresmitieron los nuestros antepasaos.

¿Qué otros blogues n'asturianu sigues?
 
Normalmente muévome al traviés de la bloguesfera n'asturianu. Sigo abondos blogues y debo ser, probablemente, ún de los llectores más cacipleros qu'esisten, porque davezu nun soi a aguantame ensin dexar dalgún comentariu ellí onde entro y suelo da-yos el turre bastante a los demás collacios de la rede. Podría dar nomes concretos de blogues que sigo, pero como de toes toes, diben quedar dellos nel tinteru, prefiero dexar la rempuesta asina.

¿Cómo ves el mundu de la bloguesfera asturiana?
 
Camiento que ta creciendo en cantidá y calidá. La mayoría somos relativamente nuevos, un blogue de tres años yá nos abulta como un auténticu güelín. Quiero solliñar qu'hai nesti momentu un númberu curiosín de blogues, tocando los temes más variaos con una calidá que namás que nun lo son a ver aquellos que se faen los ciegos a costa fecha. Sestaferiar un camín pa que l'idioma asturianu s'allugue n'internet ye fundamental y básico, y ta mui lloñe de ser daqué menor o o caxigalines de xente refalfiao.

¿Vas poder dir al Sidra&Blogues?
 
Yá comuniqué a los organizadores que cuento poder dir a recoyer el premiu y espero que nun se me tuerzan les coses. Asina que si los collacios qu'entamen esti eventu ven un vieyín sofitándose nun cayáu abeyando pelos alredores del sitiu onde se va celebrar, que nun llamen a les monxines del asilu que ta al llau pa que lu recueyan... ¡Qu'igual soi yo, cóime!.