El Partíu Unionista confirma un principiu d'acuerdu col Sinn Fein

El Partíu Unionista confirmó qu'algamare col Sinn Fein un principiu d'acuerdu sobre'l treslláu de les competencies policiales y xudiciales del Gobiernu británicu al Úlster

El cabezaleru del partíu y ministru principal norirlandés, Peter Robinson, esplicó a los medios poco antes de la medianueche, tres un conceyu con miembros de la so formación, que la decisón fuere "unánime", según informó la cadena BBC. "Caltuvimos un alcuentru mui constructivu de nuesu grupu parlamentariu", esplicó, al tiempu que señaló que l'acuerdu algamáu respeta les promeses electorales del partíu.
  
"Esperamos dir mañana (esti vienres) a Hillsborough y que'l documentu se publique", afirmó Robinson. La BBC avanzó que los primeros ministros de Reinu Uníu y Irlanda podríen desplazase güei a Irlanda del Norte.
  
Hores enantes, el partíu republicanu Sinn Fein yá asegurare que les negociaciones sobre'l treslláu de les competencies policiales y xudiciales del Gobiernu británicu al d'Irlanda del Norte acabare. Ambes formaciones lleven negociando sobre dos selmanes pa llegar a un consensu que permita al Gobiernu autónomu disponer d'un ministru de Xusticia, al que tamién dieren el vistu bonu Dublín y Londres.
  
El presidente del Sinn Fein, Gerry Adams celebró esti xueves el consensu algamáu n'Irlanda del Norte pa la devolución de los poderes de Xusticia y Policía de Londres a Belfast y antemanó que, de magar agora, les instituciones deben avanzar con "xusticia y compañerismu" pa concretar l'acuerdu.