Cataluña celebra'l 28 de febreru más consultes sobre la independencia

|

El 28 de febreru, 287.300 catalanes de 77 conceyos catalanes tarán llamaos a les urnes na que será la segunda gran xornada de les consultes soberanistes.

La mayoría de conceyos que celebrarán la consulta volverán ser de pequeñu tamañu, anque tamién sobresalen dalgunos más poblamos como El Vendrell (Tarragona), Molins de Rei, Vilassar de Mar (Barcelona) y Palafrugell (Girona), ente otros, informaron los promotores de les consultes en rueda prensa.
  
En nome d'ellos, el diputáu d'ERC nel Parlamentu, Uriel Bertran, qu'indicó que los conceyos "perdieron el mieu a ceder llocales públicos", y aseguró que nesta ocasión habrá meses electorales dientro de los ayuntamientos.
  
Tamién estudien instalar urnes n'equipamientos públicos como institutos, residencies de vieyos y hospitales pa promover el votu anticipáu.
  
"Pue perdese la sensación de novedá", polo que Bertrán dixo que se ta faciendo una campaña intensa pa incentivar la participación.
  
La Coordinadora, qu'espera la participación d'unos 5.000 voluntarios, aspira a que les consultes se celebren nun clima "verdaderamente electoral", y animó a los partíos políticos a implicase y facer campaña, anque refugó falar d'espectatives de participación.
  
El centru de datos demientres la xornada electoral tará asitiáu en Caldes de Montbui (Barcelona) y l'actu central de campaña será'l día 20 n'El Vendrell (Tarragona).
 
Según la vocera de la Coordinadora, Eulàlia Company, el resultáu final "superó les espectatives y ye una muestra de que'l movimientu tien muncha fuerza y ta consolidándose".
 
Más feches
  
Les consultes siguirán dempués del día 28 y más de 200 conceyos añadiéronse yá a la fecha del 25 d'abril. Pal 20 de xunu tán previstes nueves convocatories en destacaes ciudaes del área metropolitana como Cornellà de Llobregat --de la que'l presidente de la Generalitat, José Montilla, foi alcalde--, Sant Boi de Llobregat y Badalona, la tercer ciudá catalana más poblada.
  
Bertran consideró que, pese a que la mayoría política de la corona metropolitana nun ye soberanista, "el país ta cambiando" y mostróse convencíu de que votantes del PSC, ICV-EUiA y el PP puen ver agora con bonos güeyos el debate sobre la independencia.
 

Contador Estadistiques