"Sí, faigo promesa"

Con un “sí, faigo promesa” n’asturianu, xuraba Roberto Colunga llealtá a la Constitución y l’Estatutu, tomando posesión como diputáu pol grupu parlamentariu d’IU-BA-Los Verdes.

El Secretariu Xeneral del la organización nacionalista tomó posesión del so escañu na Xunta Xeneral usando l’asturianu, con tolos diputaos en pie y cola sorpresa de tolos periodistes qu’asistíen a cubrir la sesión plenaria, paez que poco avezaos a sentir la llingua del país nel Parlamentu.
 
Nes anteriores elecciones el miembru del Bloque ocupaba’l númberu siete nes llistes d’IU-BA-Los Verdes, el siguiente a Francisco Javier García Valledor, q’abandonó’l so escañu por discrepancies col so partíu. Roberto Colunga convirtióse asina nel primer miembru de la esquierda nacionalista con representación na Xunta Xeneral.
 
El nuevu diputáu ye un xixonés de 39 años, hasta’l momentu asesor de cultural tradicional y llingua na Xunta de Gobiernu del Conceyu de Xixón, dende onde impulsó’l festival Xixón 5º40’. Foi miembru de la Xunta Rectora Tradicional de la Fundación Municipal de Cultura y de la Universidá Popular de Xixón. Miembru fundador d’Izquierda Nacionaliega d’Asturies y del propiu Bloque por Asturies, del que ye Secretariu Xeneral.
 
Les primeres pallabres del nuevu diputáu foron n’asturianu y según dixo nuna entrevista publicada nesti mediu fai selmanes, nun van ser les úniques. Sobre posibles torgues que-y pudieran poner por facer esi usu del idioma, dixo que s’abría un nuevu momentu, “con un nuevu diputáu que falara como sabe falar, amás la llei permíteme facelo”.
 
Sicasí, les pallabres de Colunga nun foron les úniques que se sintieron n’asturianu dientro del solemne edificiu. Asina, el conseyeru de Mediu Ambiente, Ordenación del Territoriu ya Infraestructures, Francisco González Buendía, dixo, contestando al PP sobre l’informe de la Sindicatura de Cuentes, qu’esti llegará primeru al Parlamentu qu’al Gobiernu, polo que “coloradina y con rabu, cereza”, señaló.