El númberu de discapacitaos reconocíos n'Asturies ye de 128.825, de los que'l 70% son físicos y el restu psíquicos

|

El númberu de persones con dalgún tipu de discapacidá reconocida n'Asturies sube a 128.825, y d'ellos el 70% presenta una discapacidá física. Ye'l datu aportáu güei pola Axencia Asturiana pa la Discapacidá, demientres la presentación del informe 'La perceición social de la so discapacidá y los sos conflictos n'Asturies'. Una de les conclusiones del mesmu ye la necesidá d'incrementar les sovenciones a nivel personal pal acesu a les nueves teunoloxíes y los equipamientos d'apoyu pa esti sector poblacional.

Lo esplicó'l director de l'Axencia, Javier Antuña, que presentó a los medios un resume de les principales conclusiones aportaes nel estudiu. El mesmu consistió na realización d'una encuesta pa determinar la perceición que la sociedá asturiana diba tener de la incorporación d'un Plan d'Accesibilidá nel que nesti momentu trabaya yá'l Principáu.

Antuña señaló l'altu númberu de discapacitaos existentes n'Asturies, en referencia a los 128.825, y dientro d'ellos l'altu númberu de discapacitaos físicos, ente los que figuren tanto personal con movilidá reducida, como con problemes de visión o de audición. Amás, recordó que la cifra aumenta progresivamente, y que la mesma sólo fai referencia a los que tienen reconocida llegalmente la so condición, dando a entender que pue haber más persones ensin reconocencia oficial.

Antuña destacó como principal idea que la sociedá asturiana ta "preparada pa incorporar a la so vida un Plan d'Accesibilidá" que, según previó, "dibemos tirar voladores si pudiéremos presentar nel 2011". Nesti sen, según los datos del estudiu, la sociedá asturiana considera que les principales meyores del Plan deben aplicase n'aspeutos como la movilidá, el tresporte, la vivienda, la sanidá, l'emplegu, la información, la integración social, la cultura y l'ociu y l'afeutividá.

Ente estos puntos, Antuña recalcó la opinión xeneralizada de que "l'accesiblidá física ta estancada" y exemplificó con que "tovía se siguen construyendo edificios nuevos con problemes d'accesibilidá". Tamién señaló la visión social del problema del tresporte: "se considera qu'hai autobuses y vehículos más equipaos pero s'entiende que debía haber más, y mayor información sobre estos servicios".

Tamién señaló la percepción social negativa sobre les posibilidaes d'accesu a un emplegu de los discapacitaos, que nesti sen se considera "marxinaos".

MÁS SOVENCIONES

Antuña esplicó que los colectivos de dispacitaos "faen muncha referencia al coste económicu que supón na so vida privada'l poder reducir los problemes de movilidá". "Hai que tener en cuenta qu'utensilios básicos d'apoyu pa la vida diaria, como los audífonos, anden por 1.500 euros caún", matizó. Dende'l so puntu de vista, "tol material s'encarez muncho".

Por esta razón señaló que l'oxetivu de l'Axencia "ye que nel presupuestu autonómicu del 2009 s'aumenten les sovenciones, sobre too na llinia d'ayudes personales, que ye onde detectamos más deficiencies".

Contador Estadistiques