Cowen y Brown trabayen pol alcuerdu ente DUP y Sinn Féin

Los primeros ministros d'Irlanda y de Reinu Uníu podríen tornar al castiellau de Hillsborough, a les afueres de Belfast, pa evitar una crisis nel Gobioernu norirlandés.

Delles fontes de los partíos norirlandeses informaron al diariu "The Irish Times" de que Brown pue tornar esti mesmu llunes a Hillsborough ante les perspectives d'un alcuerdu inminente ente les partes sobre les competencies de Xusticia, sobre les marches protestantes y hasta sobre'l futuru de l'Asamblea d'Irlanda del  Norte.

Cowen tamién se vio obligáu a suspender un viaxe a Madrid pa entrevistase esti llunes col presidente del Gobiernu estatal, José Luis Rodríguez Zapatero, un alcuentru que, según fontes del Gobiernu irlandés, tenía como oxetivu analizar la estratexa económica de la UE pa salir de la crisis.
  
Ayeri, tanto Sinn Féin, como DUP manifestaron el so optimismu ante los "importantes avances" llograos nes negociaciones del sábadu. Los contautos interrumpiéronse'l domingu tres seis díes de conceyos intensivos y volverán entamar esti llunes.
  
El presidente del Sinn Féin, Gerry Adams, afirmó esti llunes que tanto'l Gobiernu irlandés como'l británciu deben respetar los derechos de la xente. "Ye mui difícil implicar al DUP si los gobiernos nun respeten los acuerdos", afirmó.
  
En cualquier casu, apuntó que l'atmósfera de les controversies meyoró. "Dempués de les primeres 70 o 80 hores (...) yera como xugar al 'hurling' (un xuegu d'equipu irlandés). Pudimos, creo, controlar el terrenu de xuegu, xugar col DUP, y asina siguió demientres les  siguientes 20 o 30 hores", dixo. "Toi satisfechu (...). Va haber una necesidá d'acuerdu, y mui pronto", aseguró.