L'Estaú adquier un documentu del Conseyu Soberanu

El Ministeriu de Cultura adquirió una serie de comunicaciones cola Sociedá de Naciones nel trescurrir de la Guerra Civil, ente elles, una del Conseyu Soberanu d’Asturies y Lleón.

Esti telegrama cola Sociedá de Naciones, l’antecedente de la ONU, foi’l principal motivu de resquiebra ente’l Conseyu Soberanu y el gobiernu de la República. El Ministru de la Gobernación-y tresmitió a Belarmino Tomás la so “sorpresa y disgustu”.
 
Nel telegrama, datáu’l 12 d’ochobre de 1937, mes y mediu depués de que’l Conseyu Interprovincial proclamara la so soberanía, pue lleese “aviación fascista asesina diariamente cientos de neños y muyeres, destruyendo pueblos enteros cola so metralla, mundu civilizáu debe intervenir cese tanto crime, casu contrariu nun respuendo puea pasar cinco mil prisioneros tenemos cárceles Asturies tovía cuando faigo tolo posible ye difícil contener pueblu”.
 
El Conseyu Interprovincial d’Asturies y Lleón proclamóse soberanu tres quedar aislláu’l nuesu país de les posiciones republicanes más averaes, viéndose obligáu a asumir competencies del gobiernu republicanu, como’l mandu del exércitu o la emisión de monedes y sellos.
 
El 24 d’agostu de 1937 fírmose na conocida como casa blanca, asitiada na xixonesa Plaza del Parchís, el decretu qu’afitaba la soberanía de los territorios alministraos pol Conseyu, entrando en vigor un día depués y espublizándose na prensa’l 26 d’agostu.
 
El Conseyu Soberanu foi presidíu por Belarmino Tomás, tando representaes toles organizaciones polítiques y sindicales del bandu republicanu n’Asturies. Sicasí, el PCE, parte de la CNT y dirixentes d’UXT ya Izquierda Republicana criticaron la declaración.
 
La idea del Conseyu Soberanu foi afitada por Belarmino Tomás y la mayoría de dirixentes de la FSA, anque Rafael Fernández criticó la decisión. Años depués, en 1978, ésti convertiríase nel presidente del Conseyu Rexonal d’Asturies, órganu provisional preautonómicu. Los críticos calificaben la proclamación como perxudicial, antiunitaria y cantonalista.
 
La dixebra del Frente Popular, l’agrupación de fuercies d’esquierdes fieles a la República, foi tal, qu’en dalgunos casos llegaron a la griesca personal. El Gobiernu de Valencia, onde s’asitió l’executivu d’Azaña, vio la declaración de soberanía como una rebelión.
 
Pero’l mayor enfadu del gobiernu de la República llegó cuando’l Conseyu dirixóse a la Sociedá de Naciones al traviés d’esti telegrama, potestá que namás-y correspondía a los Estaos soberanos y que provocó un incidente diplomáticu al entender l'organismu internacional que se taba amenazando cola posibilidá d'execuciones de los presos, polo que pidió esplicaciones al gobiernu de la República.