Suatea refuga'l "pautu educativu" del Gobiernu estatal

Suatea amuesa la so “alarma y ablucamientu” ente’l primer borrador del pautu educativu, yá que “namás ye una llei más que paez destinada a satisfacer al PP y la ilesia”.

Según el sindicatu, el nomáu pautu educativu, namás que ye una llei más “que traería tolos inconvenientes y prexuicios nel so desendolcu organizativu y que paez destinada a satisfacer les demandes del PP y la xerarquía católica al dar más pista a los conciertos educativos, incluyéndolos como serviciu públicu d’educación, previendo nidiamente l’aumentu de los módulos concertaos”.
 
Esclarien que cola nueva normativa va permitise la segregación del alumnáu en terceru d’ESO, con una evaluación de diagnósticu de carácter formativu y orientador, “sirviendo pa segregar al alumnáu con más importancia que los informes de los equipos educativos y departamentos d’orientación”. Suatea señala que paez “una vuelta a la so en so momentu refugada pol PSOE, LOCE del PP”.
 
El Sindicatu diz echar en falta midíes que contribuyan a la meyora de la educación, como un mayor compromisu económicu, disminución de los ratios, atención a la diversidá o la estabilidá de les plantiyes
 
Pa Suatea, el pautu educativu va xerarquizar y afalar la competitividá ente docentes, “que nun serviciu públicu nun tien sitiu”. Según la organización, el reconocimientu de los profesionales tien que venir por un plan de xubilación anticipada, “que favorecería rexuvenecer les plantilles”, y tamién garantizar una verdadera formación “que nun seya un meru instrumentu na meritocracia”.