La Selmana de les Lletres homenaxará a Xosé Antonio García

El Principáu dedicará la Selmana de les Lletres a Xosé Antonio García, escritor del Surdimientu "qu'ocupa un sitiu preferente na lliteratura asturiana de la segunda metá del sieglu XX".  
 
La Conseyería de Cultura y Turismu, al traviés de la so Direición Xeneral de Política Llingüística, ta trabayando nel programa d’actos de la 31 Selmana de les Lletres Asturianes, cola participación d’estremaos colectivos, instituciones, creadores ya investigadores, como’l poeta José Luis Argüelles y la filóloga Laura Rodríguez Solís, que trabayan na compilación y estudiu de la obra lliteraria de Xosé Antonio García. 
 
Según indiquen dende la Conseyería, l’oxetivu final ye recuperar y divulgar un autor y una época, uniendo’l so nome a la nómina de los clásicos de la llingua asturiana, homenaxeaos n’anteriores ediciones.
 
Como yá ye vezu la Selmana de les Lletres Asturianes ye una celebración plantegada como un homenaxe institucional y ciudadanu a la lliteratura en llingua asturiana. “Tanto pol so caráuter simbólicu como pola so contribución a la investigación y divulgación de la obra d’autores clásicos n’asturianu, la Selmana ye ún de los actos culturales más importantes del añu”, afirmen dende Cultura.
 
L’homenaxáu
 
Xosé Antonio García (Santa Bárbara, Mieres, 1961) fixo estudios de Filoloxía Románica y Hispánica na Universidá d’Uviéu, interesándose pol afondamientu nes llingües clásiques: llatín, griegu y árabe. Desendolcó una intensa actividá cultural dende los años setenta, dirixendo programes radiofónicos o participando nel mundu editorial. Collaboró en revistes lliteraries como “El cuélebre literario” y “Mallku” (coordinaes pol tamién mierense Nel Amaro) y en “Lletres Asturianes”. Ye autor de dos llibros de poesía: “Cuartetu de la creación” (1989) y “Alcordances d’un home muertu” (1995). Xosé Antón García morrió prematuramente nel añu 1997.
 
Contemporaneu d’autores de la segunda xeneración como Antón García, Lourdes Álvarez o Berta Piñán, desarrolló’l llabor lliterariu alloñáu de xuntances, tendencies y afinidaes grupales, pa componer una de les obres poétiques más fondes, personales y enigmátiques del Surdimientu. Dexó inédita una curtia producción narrativa, tanto n’asturianu como en castellán, ye principalmente un poeta figurativu, esistencialista, que reflexona sobre la condición humana y sobre la muerte.