El presidente de Castiella y Lleón pide alternatives a Sama-Velilla

|

El presidente de la Xunta de Castiella y Lleón dixo que ye competencia del Gobiernu estatal dar alternatives a Sama-Velilla. Mientres, Areces dixo que yera un proyeutu "prioritariu".

Ambos presidentes autonómicos trataron la situación d'esta llinia tres el IV conceyu celebráu ente Castiella y Lléon y Asturies, nel que s'evaluó'l cumplimientu de los compromisos tomaos nel conveniu de collaboración robláu'l 8 de xunetu del 2008 y nel que, dada la situación, viéronse obligaos a tratar el trazáu d'una llinia d'alta tensión con una "llarga historia", anque esta cuestión nun s'incluyó na declaración institucional final.

Sobre esti asuntu, el presidente de la Xunta de Castiella, Juan Vicente Herrera, mostróse "mui críticu" col Gobiernu central, un puntu nel que señaló que ye l'Executivu estatal el que tien competencies esclusives en materia de planificación enerxética, un área na que "nun existen compartimentos estancos".
  
Herrera aseguró que comprende la defensa d'Asturies d'esta llinia pa favorecer el desarrollu, polo que treslladó'l so ofrecimeintu pa valir de mediador col fin de llograr la meyor solución al trazáu propuestu por Rede Eléctrica Española y tres el refugu manifestáu pola "sociedá lleonesa" a esti percorríu.
  
"Somos partícipes de la so sensibilidá", destacó'l presidente de la Xunta de Castiella y Lleón, que manifestó sentise "arguyosu" del acuerdu algamáu ente'l Gobiernu central, Asturies y Castiella y Lleón nel 2005 que llogró'l "desbloquéu" de la rede.
  
Frente a esta esplicación, Juan Vicente Herrera garantizó que la so postura ye "lleal" y siempre tará lligada al acuerdu algamáu nes Cortes de Castiella y Lleón nel 2009 al traviés de la que, énte'l refugu del trazáu en Lleón, solicítase al Gobiernu que plantegue alternatives en favor del consensu, al tiempu que repitió qu'esta resolución ye conocida pola vicepresidenta del Executivu estatal, María Teresa Fernández de la Vega, y pol ministru d'Industria, Miguel Sebastián.
  
"Hai un gran refugu social y políticu en Lleón a la escontra del trazáu plantegáu pol operador", calcó Herrera, que recordó que l'ex ministru y actual voceru del Grupu Parlamentariu Socialista nel Congresu de los Diputaos, José Antonio Alonso, "encabezó manifestaciones contra'l trazáu" -na so calidá de diputáu por Lleón y en viésperes de les elecciones-, lo que, al so xuiciu, ye un "sarcasmu".
  
Dende'l puntu de vista d'Herrera, el Gobiernu español fairía mal en nun facer casu del "sentimientu enraigonáu" na provincia de Lleón, al tiempu que destacó que tien la "obligación" de resolver el problema sin meter nun "totum revolutum" a les comunidaes autónomes.
  
"Debe dar soluciones, que s'avere a Lleón y esplique'l proyectu", reclamó'l presidente de la Xunta de Castiella y Lléon, que calcó en que l'Executivu central ye'l que tien la "responsabilidá innegable" nesti aspectu.
 
 
"Prioridá dafechu" p'Areces 
  
Pela so parte, el presidente d'Asturies insistió en qu'esta linia ye una "prioridá dafechu" pa la planificación eléctrica d'España y esclaró que nun se trata d'una reivindicación escluvisa del Gobiernu asturianu, sinón que'l trazáu ye "vital" p'avanzar nes interconexones con Francia, polo qu'aseguró que-y consta que l'Executivu estatal ta interesáu nesti proyectu que figura como "prioritariu" na Planificación Enerxética 2007-16 en "vixencia dafechu" y que nun sería coherente defendar la conexón coles redes franceses ensin avanzar nel malláu español.
  
"Queremos que se cumpla dende un puntu de vista racional porque esi trazáu ye necesario", aseguró Álvarez Areces, que se comprometió a realizar un esfuerzu mayor d'esplicación d'un proyeutu que, como señaló, xenerará emplegu, ofrez la máxima seguridá y amplía'l malláu pa garantizar el suministru eléctricu.
  
Demientres la so intervención tres el conceyu d'ambes autonomíes celebráu güei en Valladolid, el presidente d'Asturies remarcó que se trata d'un problema de "índiz xeneral" que debe tratase con "racionalidá y rigor" pa favorecer el desarrollu enerxéticu del país.
  
La instalación d'esta llniia supondrá, según Areces, un incrementu de la capacidá d'evacuación tamién pa La Robla y la comarca d'El Bierzu, un aumentu de la xeneración d'enerxía procedente de renovables como la eólica y un meyor malláu, al tiempu qu'evitaría  un posible "apagón" que collevaría un "deterioru" de la industria.
  
De la mesma manera, el presidente d'Asturies garantizó'l so apoyu a cualquier midida de reindustrialización, al tiempu qu'apostó por estudiar respuestes a esti problema que valgan pal interés xeneral".
 

Contador Estadistiques