Xurde Morán: “Audiencia y asturianu munches veces van de la mano”

|

Xurde Morán (Xixón, 1967) ye una de les figures más conocíes de la radio y la televisión nel nuesu país. Asturies.com faló con él sobre’l procesu de llevar la nuestra cultura a les pantalles.

¿Cómo ñació “Caminos y Rondes”?
 
Nel añu 1996 responsables de TeleXixón punxéronse en contactu conmigo pa facer un miniespaciu de siete minutinos percorriendo diferentes llugares de la xeografía xixonesa. Decidíme pola zona rural por ser, daquella, una gran desconocida. L’espaciu diba dientro d’otros programes, tuvo ésitu y planteóse facer un programa más llargu ya independiente. Asina ñació Caminos y Rondes nel mes d’ochobre de 1998. A lo primero duraba 25 minutos, xunto con un coloquiu que presentaba otra compañera. A les poques selmanes los datos señalaron que yera un programa de máxima audiencia y decidióse amplialu, primero a los 40 minutos y depués a los 50, saltando les fronteres del conceyu. Sacóse un videu resume que se presentó na  Feria Muestres de Xixón nel añu 2000 y del que se fixeron dos ediciones, agotaes en mui pocos meses. Fíxose ún de los programes emblemáticos de la cadena, con bien de premios.
 
¿Viendo l’ésitu del so programa y de los que traten la cultura popular na TPA, por qué camienta que les televisiones nun trabayen más nesi sen?
 
Nun sé si a veces ye por desconocimientu o por nun disponer del personal afayadizu. Cuasique toles televisiones tienen o tuvieron programes d’esti estilu, unos llograron más ésitu qu’otros y siguieron, otros non. Precisamente son los programes fechos n’asturianu los que siempre tuvieron más ésitu y los que siguen n’antena.
 
¿Cómo piensa que tendría que recoyese la cultura asturiana nes televisiones locales y na autonómica? 
 
La cultura asturiana habrá presentase siempre col máximu respetu por una cultura qu’amás de ser nuestra, forma parte del patrimoniu universal de la humanidá. Con cariñu y conocimientu, ensin complexos nin argumentos tópicos, fáciles y peyorativos que tantu mal-y fixeron en tiempos pasaos.
 
¿Son los sos programes precursores de “Camín de Cantares”?
 
Nun se me revela que fueren precursores de nengún programa en concretu. Agora sí, valió pa demostrar, hai más d’una década yá, qu’audiencia y asturianu nun solo nun son incompatibles, sinón que munches veces son indixebrables, acabando con otru tópicu de que l’asturianu yera pa públicos minoritarios. Con “Camín de Cantares”, y otros, demuéstrase a la vez qu’esta forma de trabayar en televisión utilizando l’asturianu como llingua vehicular y con  gran ésitu d’audiencia  nun yera una esceición.
 
Sicasí, ¿estos programes nun ufren a l’audiencia una visión del asturianu como daqué rural y que nun val pal mundu modernu?
 
Nel programa actual, L’Andariegu de Canal 10, salen munchos pueblos y parroquies rurales, fálase de tradiciones y etnografía, naturaleza y costumes, pero tamién d’historia, arte o turismu rural. Visítense parroquies rurales pero tamién el centru les ciudaes y barrios urbanos, sal xente agricultor y ganadero, pero tamién empresarios. Percuérrese Asturies pero tamién viaxamos a Bélxica pa visitar a los emigrantes asturianos. El que diga que da una visión rural” ye que nun ve’l programa. De toles maneres tampoco hai que renunciar al pasáu rural nun namás d’Asturies sinón de toa Europa, y munchu menos a presentalu n’asturianu o pa encima avergonzáse d’ello, ¡hasta ehí podíamos llegar!
 
¿Nun ye raru, viendo l’ésitu de los sos programes, que nun lu fichara la TPA?
 
Cada mediu tien el so estilu y los sos profesionales, yo marché de Tele Xixón hai dos años y mediu pa Canal 10 y les dos partes tamos percontentes. Dende’l primer momentu foi ún de los programes estrella de la cadena n’horariu de prime time y mui bien tratáu y cuidáu. Un llugar pa trabayar a gustu, que ye lo que-y presta a cualquier profesional.
 
¿Recueye’l so programa un mundu que ta en procesu de desaniciu?
 
Una parte perimportante d’esi mundu ta en desaniciu sí. Si ves programes d’hai diez u once años y vas a esos mesmos llugares agora nun tolos cambios foron pa meyor, sobremanera nos pueblos y nel  mundu rural, pero la función de los medios de comunicación ye, o habría ser, tresmitir esi mundu y facelu perdurar nes sos coses más positives. Perdelu ye una perda irrecuperable.
 
¿En que proyeutos ta agora Xurde Morán?
 
Una serie llarga dedicada a Avilés con tolos sos barrios y alredores, La Ría, La Villa, Sabugo, L’Ensanche Barrocu, Llaranes, Villalegre, La Madalena, La Texera, y los conceyos de la redolada, principalmente la costa de Castrillón: Salinas, Arnao…

Comentarios

Ciertamente, hay en los diferentes puestos de aquí, pero que aún no ha encontrado ningún mensaje relacionado con proyectos como el HP0-J15 , HP0-S17... si alguien tiene información al respecto, me digas! Bueno, todas las actualizaciones relacionadas con este puesto? Si sí que me lo digas! Realmente me vino aquí mientras se navega red para acceder a los datos relacionados con proyectos de HP0-J22 y encontrar este mensaje diferente uno ... ¿Hay alguien que tengan información sobre HP0-J33? si sí que me lo digas! las actualizaciones? En caso afirmativo que me diga! Éste parece a mí otro tipo de post ... uno que no sabe de él antes puede obtener información útil a partir de este post ... bueno, quiero decir que la manera cómo usted trató de explicar algunos de los puestos de aquí, me parece diferente ...

Contador Estadistiques