La Coḷḷá Propinde presenta güei na FNAC "A teyavana"

La Coḷḷá Propinde, presenta güei na FNAC de Parque Principado, el que ye el so tercer trabayu discográficu, “A teyavana”. El conciertu entamará a les 20.00 hores.

El grupu de folk-fusión de Pola Ḷḷena dará un conciertín nel que podrán sentise per primera vegada en direutu dellos temes de “A teyavana”, el so nuevu discu que ta acabante de salir al mercau col sellu “Algamar Producciones”.
 
El grupu vuelve a inundar l'espaciu musical n'Asturies, esta vez por mor "d'unes lletres y unos sones allugaos a los cuatro vientos, como si d'una nueche de branu se tratara, componiendo idees al rellumu de les estrelles filtraes nel llar baxu les ripies y les teyes del cumal", según esplica la productora.
 
“A teyavana” grabóse nos estudios TUTU ente mayu y setiembre, cola producción de Sergio Rodríguez y Ánxel González. Ye un discu con doce temes onde se combinen los de reellaboración tradicional y los de composición propia del grupu. De los primeros destaca 'Yo pa qué me casaría', un cantar tradicional de Ḷḷena, y ente los segundos una muestra ye 'Skanciu', trabayu que combina los sones celtes col ska. Amás, nesta ocasión, cuenta cola collaboración de Esther Fonseca, que pon voz en '2417'.
 
Ente la biografía de La Coḷḷá Propinde, destaca'l premiu al meyor cantar n'asturianu nel añu 2003 por 'L'emigrante'. Nel añu 2009 foron banda sonora de la serie de Antena3 'Doctor Mateo'.
 
La productora Algamar, hasta agora dedicada a producciones audiovisuales, estrénase con esti discu, y con otros dos de La Tarrancha y Sambre, tamién acabantes de salir, nel mercáu musical en llingua asturiana.