Los ecoloxistes alerten de la toxicidá de la incineradora

La Coordinadora Ecoloxista, “énte les falsedaes de Coxersa”, quier denunciar que se va facer una de les incineradores más grandes del Estáu pa una de les comunidaes más pequeñes.

Señalen los problemes de toxicidá que va producir “nun radio de 15 km onde viven 800.000 persones”. Los ecoloxistes dicen que’l vertederu central nun s’acaba, “ya que’l Plan de Futuru contempla un nuevu vertederu de materiales inertes”. Amás, señalen que si se fai la incineradora ye precisu un vertederu especial d’escories y povisa, “que ye perdifícil que se puea utilizar yá que n’Asturies tán vertiendo les escories y povises de térmiques menos contaminaes”.
 
La Coordinara esclaria que l’añu pasáu lleváronse al vertederu 434.629 tonelaes de residuos urbanos d’un total de 526.000 tonelaes, polo que se reciclaron namás 52.286 tonelaes. “Si se pon una incineradora de residuos de 450.000 tonelaes, van quemar el 85% de los residuos asturianos”, señalen. Los ecoloxistes indiquen qu’en 2009, nel nuesu país namás se recicló’l 10% de residuos domésticos, “una de les tases más pequeñes d’España, alloñada de toles obligaciones autonómiques y europees”.
 
Tamién critiquen que ye “duldosu” que se vaya tramitar la incineradora en seis años, “cuando’l Principáu tramitó la fallida planta de biodiesel del Musel en 15 meses”.
 
La incineradora y la salú de los asturianos
 
Los ecoloxistes quieren recordar les conclusiones del Simposium Médicu sobre incineración y salú, celebráu en San Sebastian, yá que pa la Coordinadora “son clarificadores coles declaraciones d’estos responsables políticos”.
 
Nel Simposium, concluyóse que la salú ta arreyada al entornu y al mediu ambiente y les incineradores modernes siguen produciendo tóxicos que son emitíos polos gases de la chimenea y acumulaos na povisa y escories. Los ecoloxistes recuerden que nun perímetru de 15 Km alredor de la incineradora que quieren facer, viven 800.000 asturianos.
 
Señalen que, cuanto más se conoz la so toxicidá, más s’amenorguen les llindes d’emisión. Amás, dicen qu’hai que tener en cuenta que namás se conoz un 20% de los tóxicos xeneraos. Poro, afiten que la mayoría de países avanzaos tienen la incineración como una teunoloxía n’amenorgamientu.
 
Esclarien que les toxines, producíes na combustión, son los contaminantes más peligrosos, manteniéndose nel organismu, pudiendo “viaxar” a dellos quilómetros ya introduciéndose na cadena alimentaria al traviés del so depósitu nel suelu. Afirmen que les manifestaciones canceríxenes d’un tóxicu pue manifestase n’años, “y pue atravesar la placenta, manifestándose na xeneración viniente”.
 
L’informe, según los ecoloxistes, diz que los gases xeneraos producen un aumentu de la mortalidá importante, “sobre too ente los sectores de población más susceptibles, inclús cuando les emisiones tán dientro de les llindes permitíes”. Poro, señalen qu’afitar que nun esisten riesgos pa la población averada “ye un llema ensin fundamentu científicu”, yá que “nun paren d’apaecer estudios qu’asocien incineradora y patoloxíes”.
 
La Coordinadora señala la necesidá d’apostar pola recoyida selectiva, reducir los volúmenes y producir col restu compost de calidá “qu’anguaño ye la meyor alternativa, con meyor impautu ambiental y teunolóxicamente meyor desarrollada”.