Coxersa da-y a la incineradora un plazu d'execución de seis años

El xerente de Coxersa dixo que la incineradora cuenta con  un plazu d'execución de seis años y afirmó que si se llogra facer nesi plazu "sería mui rápido". Amás, manifestó qu'a la mesma llegará'l 45% de los residuos.

Santiago Fernández ofreció güei una rueda prensa pa dar cuenta detallada del plan de futuru de Coxersa, qu'inclúi la construcción de la incineradora pero que "da mayor relevancia al reciclaxe", con cifres que se quieren incrementar d'equí al 2015 nun 128%.

El xerente de Coxersa insistió en que según los estudios técnicos nel 2015 el vertederu tará na llende de la so capacidá, polo qu'indicó que ye necesario pronese a trabayar lo primero posible, antes, teniendo en cuenta los plazos y la complicación de la obra, pa que Coxersa siga siendo una solución a los residuos.
  
"El vertederu ye un güecu, puer ser más grande o más pequeñu, pero'l güecu enllénase y hai que tener una solución", dixo Fernández, qu'añadió que "espera y desea qu'antes del branu" entamen los trabayos y se ponga en marcha'l procedimientu pa construyir la incineradora, un proyectu que supón una inversión de 250 millones d'euros, según los estudios del 2005.
  
Pa que los trabayos entamen antes del branu sería necesaria la convocatoria d'una Xunta Estraordianria del Conseyu de Gobiernu del Consorciu pa la Xestiónd de Residuos d'Asturies, dao que si nun diba haber qu'esperar al mes de xunu pa que'l proyectu s'incluyere nel orde del día de la xunta ordinaria correspondiente.  
  
Sicasí, Fernández insistió en que son los responsables políticos, los que deciden feches, anque dende un puntu de vista téunicu "debería entamase yá a trabayar porque los plazos son mui axustaos". "Creo que llegar al 2015 sin una solución supondría munchos más inconvenientes", manifestó.
  
Sobre la cantidá de residuos que llegarán a la planta d'incineración, Santiago Fernández esplicó que nesti momentu lleguen a Coxersa un millón de tonelaes al añu, d'elles son unes 700.000 les que van al vertederu, que poco a poco "acaba la so capacidá". El restu van a diferentes planes de tratamientos y reciclaxe.
  
Los planes del Consorciu ye que d'equí y al 2015, y gracies a los 90 euros d'inversión en nueves plantes de tratamientu y reciclaxe, reduciránse 250.000 tonelaes los residuos "restu", y dicir, que serán  unes 450.000 tonales les que lleguen a la incineradora.

Asitiamientu de la incineradora
  
Entrugáu pol asitiamientu de la planta d'incineración, Santiago Fernández esplicó que la llexislación obliga a presentar tres alternatives que se someterán a los estudios d'impactu ambiental.
  
Una d'eses alternatives serán los terrenos de Coxersa, en Serín, xunto al restu d'instalaciones, polo que Fernández mostróse confiáu en qu'esa será la opción más apropiada, dada la cercanía al restu d'instalaciones. Nesti sen, indicó que se trata de "un sitiu envidiable pa esta instalación", polo que "nun ve la posibilidá de salir d'ehí". Sicasí, insistió en que será l'estudiu d'impactu ambiental el que tenga la última palabra al respeuto.
  
Sobre los efectos de la instalación, Fernández indicó que "lo que ta claro ye que serán estrictamente cumplidores cola llexislación vixente. "Tolo que salga pela chimenena se regulará y seremos mui rigurosos col cumplimientu de la llexislación", dixo Fernández, qu'añadió que respeta les opiniones de cualquier formación o persona al respeuto.
  
En cuanto a los vecinos de la zona, el direutor de Coxersa mostróse convencíu de que bona parte de los mesmos prefieren la incineradora a los vertederos. De toes maneres, recordó que los vecinos de los sos alredores de les instalaciones de Coxersa tienen "mui cerca de los sos cases un llugar al que llega muncha basoria y lleven munchu tiempu soportándolu".
  
"Los vecinos tán cansaos y demanden a Coxersa que les molesties acaben. Ellos saben qu'eses molesties reduciránse coles plantes futures", acabó Santiago Fernández.