"Llogas carbayesas", lliteratura n’asturianu dende Zamora

|

La editorial estorgana Llibros Filandón acaba de publicar “Llogas carbayesas” de Juan Andrés Oria de Rueda, dientro de la colección La Ponte de Santa Catalina, dedicada a la poesía. Ye’l primer llibru de poesía del autor y tamién la primer obra n’asturianu publicada por un zamoranu. La editorial, ñacida en 2008 de la mano de Xosepe Vega, ta realizando una importante llabor pola lliteratura de nueso al sur del Cordal.

Juan Andrés Oria de Rueda Salgueiro entamó hai unos años a publicar les sos “Llogas carbayesas” na revista El Llumbreiru, de l’Asociación Cultural Zamorana “Furmientu”. Nelles, fala de los pueblos y les xentes, les plantes y los animales, los trabayos y los díes de los güelos, dichos coles pallabres de siempre. Por primera vez, un zamoranu usaba la llingua propia pa componer y publicar versos que-y volvíen la vida y la dignidá, al idioma, a los que lu falaron y a los que siguen falándolo.
 
“Llogas Carbayesas” súmase a la riestra de llibros publicaos por Llibros Filandón; los poemarios‘El ñegru amor’, de Ramón Rei y “Poemas pa nun ser lleídos” de Francisco Javier Pozuelo, y a los llibros de narrativa “Epífora y outros rellatos”, pa dalgunos el llibru fundacional de la nueva lliteratura lleonesa, y “Breve hestoria d’un gamusinu”, los dos del propiu Vega.

L’asociación zamorana Furmientu quixo felicitar a Oria de Rueda, sociu de l’asociación y collaborador de “El Llumbreiru”, pola espublización del poemariu.

Contador Estadistiques