IU alvierte del peligru que cuerre'l pautu pola incineradora

IU-BA-Verdes alvirtió a la FSA que'l pautu nun "saldrá favorecíu" si l'Executivu instala la incineradora de Serín y esixó a Coxersa la ellaboración d'un plan de tratamientu de residuos como alternativa.

Asina lo espresó Jesús Iglesias, voceru del Grupu IU-BA-Verdes, demientres una rueda prensa na que respondió a la propuesta ayeri que la Federación Socialista Asturiana (FSA) plantegó al Executivu autonómicu pa la puesta en marcha del proyeutu de la incineradora.  
  
Iglesias yá adelantó la posición contraria de los dos conseyeros de la so coalición, integrantes del Gobiernu, a esta posibilidá. Entrugáu polos periodistes pol caltenimientu del pautu de gobiernu ente esta posibilidá, afirmó que l'alcuerdu "nun saldría favorecíu si FSA impón esta decisión", pero que prefería pensar que nun se llegaría a esti estremu.
  
"Nun apoyaremos esta midida y esixiremos que se ponga en marcha'l plan de tratamientu", señaló Iglesias. "Los nuesos conseyeros plantegarán nel Gobiernu que lo que tien que pidir a Coxersa ye un programa de tratamientu de los residuos d'esta comunidá autónoma, nel marcu del vertederu de Serín, que tien una fecha indeterminada d'ausencia de capacidá pa siguir recibiendo los vertíos que se tán llevando ellí", comentó.
  
Debe ser un plan, según el responsable d'IU, "sin condicionantes previos", puesto que si se realiza ente demandes de que "se ponga en marcha una incineradora, ta eliminándose la posibilidá de que se busque una alternativa al tratamientu de los residuos".
 
Marcu llegal
 
Según Iglesias, existe un marcu llegal que xustifica dichu plan y que torga la instalación de la incineradora, recordando "la direutiva 2008/98 del Parlamentu Européu qu'establez obligaciones pa los estaos que formen parte de la UE y pa España, y na que se diz "con total claridá qu'antes del 2020 deberá aumentase como mínimo hasta un 50% global del so pesu la preparación pa la reutilización del recicláu de residuos materiales tales como'l papel, el plásticu, los metales y el vidriu; y enantes del 2020 facer lo mesmo col 70% de los materiales de construcción y de les demoliciones".
  
"Cuando Asturies ta recuperando y reciclando porcentaxes tan baxos de vidriu o papel, plantegar la incineración de too esto que nun se recicla supón incumplir esta directiva", criticó.
 
Estudios non rigurosos
  
Exixó tamién la ellaboración d'estudios rigurosos, porque "los estudios que se baraxaron p'apoyar esta incineradora resulten cualquier cosa menos rigurosos". "La realidá demostró que les previsiones de xeneración de residuos que s'algamen nel estudiu del 2002 nun s'algamen nin de broma, pues tamos mui lloñe de xenerar esi volume", señaló en  rellación a ún de los informes qu'apoya la construcción de la planta.
  
Amás, recordó la "amplia doctrina alministrativa" qu'al so xuiciu caltién la ellaboración del mentáu plan. Señaló'l pronunciamientu de la Xunta aprobando una proposición non de llei conxunta d'IU y PSOE nel 2006, que pide que se desarrollen toles posibilidaes de tratamientu ecolóxicu de residuos qu'ofrecen toles alternatives de reutilización.
 
Tamién se refirió al alderique d'orientación política del 2008, "nel que s'aprobó una resolución col apoyu del grupu socialista, y onde se plantega un plan de choque de xestión de residuos"; y a lo último, l'alderique d'orientación política del 2009, onde se tomó "otru acuerdu pa incrementar l'esfuerzu inversor nel tratamientu de residuos y el reciclaxe".
  
Tamién recordó que l'acuerdu de Gobiernu reproduz lo que "asentamos esto años na Xunta", porque plantega la xestión de Residuos, un programa de xestión, confinanciáu con Coxersa y conceyos.
  
A lo último, comentó que la incineradora, tal y como ta plantegada, quemaría'l 90% de los residuos xeneraos n'Asturies, cuando "en nenguna de les plantes d'Europa se pasa del 15% o'l 30%, lo qu'indica que nun hai nenguna política medioambiental, sinón una política de negociu".