"Conceyo de Cantares", un repás pela música del Occidente

La Oficina de Coordinación Cultural y Llingüística del Parque Históricu del Navia ta acabantes d’espublizar “Conceyo de Cantares”, un CD con doce cantares n’eonaviegu que quier amosar la variedá territorial, llingüística y temática de los nuevos conceyos.

El discu ta producíu ya iguáu polos Conceyos del Parque Históricu del Navia (Bual, Cuaña, El Franco, Grandas de Salime, Eilao, Navia, Pezós, Tapia y Villayón), al traviés de la Oficina de Coordinación Cultural y Llingüística y editáu cola collaboración de la Conseyería de Cultura y Turismu.
 
El CD ta formáu por doce grupos y solistes, con cantares d’estilos bien estremaos, dende’l folk sentíu ya intimista o más convencional, el pop-rock, rock-folk… y cantares tradicionales del occidente, dalgunos d’ellos yá editaos y recopilaos y otros fecho pa la ocación.
           
Francisco del Camín de Rozadas, Bacotexo, Herbamora, Elisa, Mestura, Mezá, Diaño Burlón, Cádaba, Tuenda, Hermaos del Herbaseca, Igor Medio y Lisardo Prieto, y Elena Mera Alonso formen los grupos ya intérpretes que son parte de “Conceyo de Cantares”, que cunta nos sos testos coales collaboraciones d’autores como Marisa López Diz, Carmen Trevías, Xosé Miguel Suárez Fernández, Tapia; Ricardo Saavedra Fernández-Combarro, Iván Iglesias Fernández, Cazarón; o Miguel R. Monteavaro, amás d’un buen númberu de collaboradores, como Xosé Antón Fernández, Ambás, Servando Fernández Méndez o Nacho Pérez González.
 
Con edición billingüe n’eonaviegu ya inglés, grabáu y amestáu en Tutu estudios de Corvera, Estudios d'Ángel Berdiales y los estudios de Manuel Viña, “Conceyo de Cantares”, ta editáu pol sellu Tierra Discos, S.L. de Cuideiru. El discu va repartise de baldre nel territoriu del Parque Históricu del Navia y nel restu del territoriu asturianu y español.