Fala Ceibe quier el reconocimientu del gallegu n’El Bierzu

El coleutivu Fala Ceibe d’El Bierzu quier el reconocimientu del gallegu na próxima reforma de la Llei Comarcal. L’asociación quier que se reconoza’l gallegu como propiu del Bierzu occidental y que’l Conseyu Comarcal fomente esti idioma y faiga usu d’él.

Fala Ceibe quier que’l gallegu seya “idioma propiu del Bierzu Occidental”, que’l Conseyu Comarcal use de manera institucional l’idioma, que s’apoye l’usu del gallegu nos ayuntamientos y que se puxe pol so usu ente la ciudadanía.
 
Del mesmu mou, l’asociación quier la denominación billingüe de los conceyos d’El Bierzu Occidental y que se regularicen les rellaciones alministratives con Galicia “cola sida d’executar programes de normalización llingüística y cultural”.
 
Anguaño, n’El Bierzu Occidental ta permitida la enseñanza reglada del gallegu por mor d’un alcuerdu ente les Conseyeríes d’educación de Galicia y Castiella y Lleón. Nel cursu 2008-2009 foron más de mil los escolinos qu’estudiaron gallegu n’El Bierzu. Amás, l’Estatutu d’Autonomía castellano-lleonés reconoz la proteición y promoción del gallegu.