2.500 profesores tán llamaos a la fuelga esti miércoles y el 24 de febreru

Más de 2.500 profesores de 70 centros concertaos tán llamaos a la fuelga convocada pal 27 de xineru y el 24 de febreru, énte los "continuos incumplimientos de los alcuerdos y l'actitú de despreciu de l'Alministración". La fuelga afectará a 34.000 alumnos.

La convocatoria de fuelga presentóla güei en rueda prensa representantes de los sindicatos convocatantes Otecas, USO, FSIE, CC.OO y FETE-UXT.
  
L'acuerdu sobre les plantiyes que redunden nuna reducción de la carga llectiva del profesoráu y na meyora de la calidá educativa ye una de les principales reivindicaciones de les organizaciones sindicales. Nesti sen, el representantes d'Otecas, José Luis Barrera, recordó qu'en xunu del 2009 el conseyeru d'Educación, José Luis Iglesias Riopedre, presentó-yos una propuesta qu'ellos se comprometieron a estudiar pa setiembre y pa la que yá nun hai dineru.
  
"En setiembre naide mos convocó pa falar de la propuesta y nel mes d'avientu'l propiu Riopedre dizmos qu'esi dineru destináu a la propuesta esfumóse, asina que yá nun volvió a convocamos más", dixo Barrera, qu'añadió que la situación de les plantiyes ye "grave" y arrástrase dende'l 2000.
  
La retirada de la impugnación presentada al Conveniu de la enseñanza concertada y l'abonu de la paga de 25 años d'antigüedá ye otra de les reivindicaciones. El representante de FETE-UGT, Celso Suárez, indicó que'l Gobiernu ta incumpliendo una resolución de la Xunta Xeneral aprobada por unanimidá.
  
Otru de los aspectos que reclamen y que "escede lo meramente llaboral" tien que ver cola igualdá na atención d'alumnos con Necesidaes Educatives Específiques, dao que, según el representante de FSIE, José López, anque nos centros concertaos hai matriculaos un porcentaxe d'alumnos con estes necesidaes asemeyáu a los centros públicos, el númberu d'hores d'atención vino rebaxándose de manera sistemática.
  
La reconocencia de l'antigüedá de los recolocaos, la meyora del alcuerdu de les xubilaciones parciales, l'acuerdu retributivu y el complementu autonómicu pa meyorar les retribuciones del personal d'Alministración y servicios son el restu de reivindicaciones de los sindicatos.
  
Y ye que, al so xuiciu, la falta de solución a estos temes posicionó a la enseñanza concertada d'Asturies na cola d'España en cuanto a recursos y condiciones llaborales.