Andecha refuga'l desfile militar de Siero

|

Énte la próxima parada militar que s'entamará en Siero, Andecha Astur considera llamentable la promoción por parte del Conceyu de los valores “antidemocráticos , imperialistes, homófobos, sexistes y de sumisión que representa l´exércitu”.

Andecha Astur quier amosar la so refuga a esti tipu d´actos “que pretenden militarizar la sociedá civil y presentar a los exércitos como instrumentos modernos al serviciu del ciudadanu tapeciendo los valores represivos, imperialistes, machistes, capitalistes y antidemocráticos que representen”.
 
Señalen que la so organización considera vergoñoso que cola crisis permanente que carez Asturies, con una de les tases de paru más altes de toa Europa, condergada al desmantelamientu industrial y en procesu de desaniciu cultural, llingüísticu y natural, un conceyu asturianu entame actividaes belicistes propies del españolismu más ranciu.
 
Del mesmu mou, denuncien que dende les instituciones oficiales pretenden aprovechase de la situación de la mocedá asturiana, “condergada a la emigración forciada y a la esplotación y precariedá llaboral”, pa ufiertar l´exércitu español como una salida.
 
La organización fai un llamáu a la sociedá asturiana, y especialmente a los vecinos de Siero, pa que nun collaboren con esti tipu d´actividaes y amuesen la so refuga al actu. Esclarien qu’Andecha siguirá puxando por una Asturies desmilitarizada, “dientro d´un mundu ensin guerres, onde los exércitos nun tengan xacíu nin haya sitiu pa opresores”.

Contador Estadistiques