"Pachín de Melás" entama una tertulia sobre l'asturianu nel enseñu

|

La Tertulia Pachín de Melás va falar sobre los primeros años d'introducción del asturianu como asignatura nel sistema educativu. Col títulu "Trenta años de Bable nes Escueles" afondarán nesti tema tanto dende'l puntu de vista vindicativu, como de la esperiencia de les primeres escueles pilotu.

La tertulia, una iniciativa mensual del conceyu de Xixón de la UNA, va cuntar cola participación d'Urbano Rodríguez, maestru y fundador de Conceyu Bable nel conceyu de Xixón; Pablo Xuan Manzano, maestru y presidente del coleutivu "Llingua y enseñanza"; y Xosé María García "Llábana", maestru d'asturianu que formara parte del coleutivu de maestros qu'entamara a trabayar nes escueles pilotu, nesti casu nel C.P. Evaristo Valle de Xixón. Dicir amás que tanto Urbano Rodríguez como Pablo Xuan Manzano son miembros de númberu de l'Academia de la Llingua Asturiana, precisamente pol so llabor nel ámbitu educativu.
 
Dende Unidá Nacionalista Asturiana-Xixón quieren reconocer con esta charra'l trabayu de les persones que ficieron posible qu'anguaño seyan 22.000 los escolinos y escolines qu'estudien Llingua Asturiana, “plategando sicasí la posibilidá d'organizar una nueva tertulia cola situación actual de l'asignatura y tolos pilancos qu'arrecostina inda güei”, señalen. La tertulia tendrá llugar na Cervecería Astuera de Xixón, el martes 26 de xineru a les 20.00 hores.

Contador Estadistiques