Feito diz que les polítiques de mocedá nun preocupen a Areces

El presidente del Conseyu de la Mocedá del Principáu d'Asturies denunció’l conxuntu de polítiques de mocedá del Principáu, que vienen a reflexar que “son les que menos-y preocupen a Areces nesti momentu de crisis”.

Paulino Feito señaló que les partíes destinaes a favorecer la integración de les persones moces nel mercáu llaboral quédense reducíes a 137.000 euros pal 2010, “cuando en 2009 yá baxaran dende los16.048.000 a los 3.349.000 euros. Dende’l CMPA esclarien que “lo mesmo ocurre col Programa d’Emplegu pa Mozos', pal que l’ACEBA alcordara un presupuestu de 12.960.000 euros y qu’ensin embargu van quedase en 2.750.000 euros.
 
Tamién señaló que’l presupuestu del Institutu Asturianu de Mocedá sufrió una reducción del 19,7 %, lo que pa Feito reflexa que “les polítiques de mocedá tampoco son prioritaries”. El desinterés de la Conseyera queda nidiu, según Feito, “si pensamos que dende qu’asumió’l so cargu nun convocó nenguna vez al Conceyu Rector del IAJ, cuando tien la obligación de facelu cada seis meses”.
 
 L’Institutu ye l’encargáu, según esplicó, d’establecer los finxos de les polítiques de mocedá del Principáu, “poro, entendemos que la falta d’estos aconceyamientos significa que se quieren esconder o qu’estos finxos nun esisten”. Del mesmu mou, señaló que tovía tán esperando a que s’apruebe’l Plan Integral de Mocedá 2008 – 2011.
 
Dende’l CMPA, criticaron que si haya perres pal Festival Juventú, 425.000 euros nun fin de selmana, y llueu, la Plataforma Xuvenil de Turón, que xestiona una casa de mocedá demientres too un añu, vea reducida la so subvención nun 25%, “peligrando asina la continuidá del so proyeutu, del que se beneficia tol valle”.
 
Pa tratar toes estes cuestiones, el Conseyu vien pidiendo dende va tiempu un aconceyamientu con Álvarez Areces, quien hasta la fecha nun quixo recibilos.