El PP de Lleón quier que'l Gobiernu central paralice Sama-Velilla

Los conceyales del PP de Lleón presentaron una moción pal so alderique nel próximu plenu, encaminada a que'l Conceyu se dirixa al Executivu central y esíxa-y la paralización de la llinia Sama-Velilla.

El voceru de la formación, Julio Cayón, esplicó que la presentación de dicha moción resulta necesaria porque nel momentu actual Asturies cuenta con siete llinies d'alta tensión, trés d'elles intercomunicaes con Lleón, según informó'l PP.
  
De la mesma manera, señaló que la execución de la Sama-Velilla conlleva la instalación de torres metáliques de 51 metros d'altor por cada 500 metros a lo llargo de 120 kilómetros, lo que significa más de 200 torres xigantes na so trayectoria.
  
"L'impactu paisaxísticu y ambiental nun ye asumible", recalcó, y precisó que la llinia atravesará terrenos declaraos Reserva de la Biosfera, pola Unesco, nos qu'existen especies protexíes como carrascos, texos, gallos monteses y osos, ente otros, mientres que'l pasiellu de torres creará un territoriu "muertu" y aumentará'l riesgu d'incendios en tol percorríu.
  
A estes cuestiones súmase la "gran oposición vecinal" al proyeutu, materializada en más de 25.000 alegaciones contra la so execución y la sensibilidá de la población afectada hacia los efectos negativos que los campos electromagnéticos podríen tener sobre la salú y la contaminación acústica, asina como hacia les "nefastes consecuencies" que podría suponer nes esplotaciones agraries y ganaderes, base fundamental de la economía de la zona.