Los espulsaos d'IU-Uviéu piden a Iglesias qu'abandone'l so "autismu" políticu

L'autonomada "executiva d'IU d'Uviéu nun reconocida" esixó a Jesús Iglesias, qu'abandone'l so "autismu" políticu y proceda a la xestión del procesu de reingresu dende la nueva base orgánica en desarrollu de tolos escluyíos con anterioridá a les eleiciones municipales.

Los espulsaos d'IU d'Uviéu pidieron tamién a la direición rexonal del partíu que proceda a homologar estatutariamente la so Izquierda Xunida d'Asturies pa que sía una organización federada n'armonía cola nueva IU Federal anticapitalista.      
  
Amás, reivindicaron el so drechu a siguir lluchando pol proyeutu d'una IU que defenda los intereses de los trabayadores "frente al secuestru de sigles que se cometieron na ciudá y na nuesa organización".
  
Dende esti grupu recordaron que tiempu enantes de les anteriores eleiciones municipales y autonómiques, (27 de mayu del 2007) a los militantes d'IU d'Uviéu espulsóselos de facto de la organización y la direición rexonal "punxo nel nuesu llugar a unos suplantadores de delles procedencies, la mayoría d'ellos nun militaren nunca n'Uviéu".
  
"Cuando se produxeron les eleiciones, yá tábemos espulsaos de facto d'IU, poro, ye d'aplicación l'anulación de toles sanciones por nun tratase de manera dalguna de persones que decidieren confrontar con IU dende IU, dao que resultaren espulsaos", añadieron.