La Ñeve

 

Asturies apaez n'iviernu cubierta de mantos de ñeve qu'ufierten al propiu y al turista posibilidades pal esquí y la alta montaña. Un de los sitios más conocíos ye'l Puertu Payares, pero tamién Lleitariegos, Tarna o los Picos d'Europa sorprenden al que los conoz en branu, ya que envernáu el paisaxe ye bien estremu.

Casi tolos deportes d'iviernu nacieron n'Europa, concretamente nos países montañosos y fríos.Los esquís más antiguos del mundu tienen alredor de 5000 años y encontraronse'n Suecia. Dientru los deportes d'inviernu, el esquí ye'l deporte rei. L' esquí nórdicu comprende pruebes de fondo y saltos. Llámase esqui alpinu al que se pratica nes lladeres y entamó praticase en 1880 nos Alpes. Tien cuatro especialidaes: descensu, slalom, slalom xigante y slalom superxigante. L'estilu llibre ye una modalidá reciente.

Una manera cenciella y personal d'evaluar el to nivel d'esquí ye la facilidá con qu'abordes el retu d'acceder a las diferientes pistes. Los colores indiquen los niveles de dificultá de les mismes. Verdes (fácil), Azules (media dificultá), Roxes (dificiles) y Prietes (expertos), daránte la medía del to nivel deportivu.

Na ñeve, l'esquí y el snowboard representen al 95% d'aficionáos. El 5% restante inventa cada vegada nueves formes. El snowbike, los neumáticos, el heliesquí, el parapente con esquís o el bigfoot formen parte del deporte d'aventura. Anque la verdadera aventura ye la de los neños y neñes baxando les cuestes nevaes en culosquí o improvisaos trineos.

Y falando de rapacinos, tampoco podemos escaecenos d'otru deporte tradicional, comu ye'l llanzamientu de boles, nel qu'hai verdaderos profesionales.

La estación de Valgrande Payares ye dende antañu un puntu de referencia obligáu dada la so condición de principal vía de pasu a través de la Cordelera Cantábrica. La so estratéxica situación orográfica (a pocu más de media hora de Lleón y d'Uviéu) xunío a les favorables condiciones orográfiques del entornu ficieron que yá en 1953 instalárense nella los primeros remontes , convirtiéndose asina nuna de les estaciones de esquí más antigües d'España.

A esta tradición pal deporte blancu, xuntase el estraordinariu y reciente desarrollu de medios e infraestructures pa la práctica del esquí. Cuenta con clínica deportiva, escuela d'esquí, alquiler de material y animadores deportivos. Trece remontes repartíos polos distintos sectores de la Estación (telesquís y telesielles) posibiliten el descensu per kilómetros de pistes de diferientes graos de dificultá.

Los prácticantes del esquí alpinu, modalidá mayoritaria, alcuentren el llugar idóneu pa disfrutar del so deporte favoritu. El creciente númeru de fanáticos del snowboard y el monoesquí tienen tamién nes sos pistes el meyor escenariu pa dar rienda suelta a la so imaxinación y destreza, tamién durante la nueche. Los incondicionales del esquí de fondu cuenten con itinerarios específicos qu'atraviesen viesques y abruptos paraxes. De igual forma, los amantes de la soledá, l'esfuerzu y los grandes espacios abiertos, alcuentren nes cumes circundantes a la Estación un especial aliciente la prática del esquí de travesía.

Payares tá arrodiáu de cumes como Cerra, la Picarota, los Cel.leros, El Cuitu Nigru y El Cel.lón. Nes inmediaciones de la Estación tán dellos de los sectores más guapos de la Cordelera Cantábrica.

Les Ubines, ufierten nos meses fríos un impresionante ambiente alpinu y son tou un retu pa los prácticantes del montañismu. Per debaxu les cumbres, hai aldees que siguen inalteraes col pasu'l tiempu y redolaes de viesques comuoValgrande, de gran valor ecolóxicu por ser zona de refuxu de especies en víes d'estinción comu'l osu pardu cantábricu, el llobu y el gallu montés.

Una amplia ufierta de establecientos hoteleros permiten al visitante disfrutar del merecíu descansu y d'una variada gastronomía. Otru sitiu pal turismu d'inviernu ye 'l Puertu'l Pontón, al que s'accede dende Cangues de Onís, per Asturies, a través del desfiladeru los Beyos. A partir d'Oseya de Sayambre y peles zones de Panderueda y Valdeón, en Lleón pueden facese rutes prestoses pal esquí de travesía.

Na otra punta, nel occidente, ta'l Puertu de L.leitariegos, a 35 Km. de Cangues del Narcea, que comunica con otra estación na vertiente leonesa, que ye mui usada polos de occidente pa la práctica del esquí. El puertu más conocíu del país vecin ye San Isidro, que ye'l que tien meyores instalaciones. Hai travesíes ya clásiques, como la de Payares-San Isidru.

Los Picos tienen tamién zones como Ario o Vegarredonda muy apreciades polos amantes desti deporte. Aunque pa realizar esquí de fondu o faer escursiones per picos, el sitiu ideal ye'l Parque Nacional de la Montaña de Cuadonga. Les rutes parten de los Llagos, que ye fácil ver xelaos. El contraste, pal que los conoz del branu, ye espectacular pola intensidá de la lluz y les impresionantes cimes blanques que los arrodien.

Nel puertu de Tarna tamién podemos encontrar instalaciones óptimes pa pasar unos díes na ñeve. Accedése pel corredor del Nalón; remontando el ríu llegamos a una estación de esquí , pequeñina pero muy afayaíza.

Na mayoría de los sitios podéis contactar con Guíes de Montaña y hai numeroses empreses de turismu activu que organicen actividaes que incluyen aloxamientu, cursillos, tresllados, etc .

Fuera de les estaciones y les rutes señalizáes, hai que tener munchu cuidáu ya que la visibilidá pue perdese pela ñeve y la borrina en cuestión de minutos y ye fácil estravíase o depeñase. Toles temporaes hai accidentes mortales, inclusu ente los más avezaós, asina que si vais sólos aconseyovos dir con guía o, polo menos, avisar nel últimu pueblu del camín que vais siguir. Énte la ñatura xabaz, toles precauciones son poques.

Pilar Sánchez Vicente


 

Contador Estadistiques