UNA esixe'l fin de los espectáculos nos plenos en Xixón

La vocera d'Unidá Nacionalista Asturiana en Xixón, Yolanda González, esixó al PSOE y al PP respetu a los ciudadanos, asina como'l fin de les "bufonaes" demientres los plenos, que considera especialmente graves nuna época de crisis como ésta.

Pa UNA, tanto les declaraciones de Faustino García como l'abandonu del Plenu per parte de los conceyales del PP demientres la intervención d'ésti "constitúin una falta de respetu dafechu a los ciudadanos" que per otra parte cabe atribuyir "a la falta d'inciatives per parte del PSOE y el PP", declaró Yolanda González nuna nota prensa.
  
La responsable d'UNA refugó como "impropies" d'un responsable políticu y especialmente "desafortunaes" les declaraciones de Faustino García, que "como siempre van más orientaes a insultar a la oposición qu'a esplicar l'aición del Gobiernu", y consideró "infantil" l'actitú del PP por "abandonar un Plenu por unes declaraciones inoportunes".
  
Dende UNA exixeron otra vuelta "respetu pa los ciudadanos y les instituciones democrátiques" y que se "usen los plenos p'aldericar los problemes de la ciudá, non pa escenificar espectáculos penosos y que nun van ayudar a naide a salir de la crisis nin a suavizar los sos efectos", acabó Yolanda González.