La Real Academia Galega va escoyer al so presidente’l próximu sábadu 23 de xineru. Pel momentu l’únicu candidatu ye Xosé Luis Méndez Ferrín, ún de los meyores escritores en llingua gallega, políticu del nacionalismu estraparllamentariu y conocíu defensor de la galleguidá de la zona ente'l Navia y l'Eo.

Anque los estatutos de la RAG permiten presentar alternatives hasta 48 hores enantes del entamu del procesu d’eleición, yá se supón una mayoría pa la candidatura de Ferrín, avalada pol anterior presidente de la RAG, Xosé Ramón Barreiro.
 
Ferrín, ún de los grandes escritores de la lliteratura gallega contemporanea, ye miembru de la RAG dende l'añu 2.000. Una de les sos obres de referencia "Retornu a Tagen Ata", foi traducida al asturianu en 1985. Amás de la so actividá lliteraria, Ferrán ye un nacionalista gallegu históricu. Foi fundador de la UPG, partíu mayoritariu nel BNG, nos años 60 pero abandonó la formación frentista nos años 80 y anguaño ye un militante destacáu  de la fuerza estraparllamentaria Frente Popular Galega. Amás foi candidatu a les eleiciones europees con Iniciativa Internacionalista.
 
El fechu ye  históricu cuando la RAG va enfrentase a un executivu gallegu qu’entamó a abrir la guerra llingüística y que, según los defensores de la normalización de la llingua, quier valtar colo que se fixo en política llingüística nestos años.
 
El propiu Xosé Ramón Barreiro, anterior presidente de la RAG, frañó cola neutralidá política de la institución criticando la política llingüística de Feijóo énte la presencia del propiu presidente. Mesmamente ayeri, la RAG daba a conocer la so refuga al nuevu decretu sobre la presencia del gallegu nel enseñu y pidía la so retirada.
 
De llegar a aprobase’l nuevu decretu, nel país vecín habrá una educación en gallegu, castellán ya inglés a partes iguales. Amás, los padres participarán na eleición del idioma pa cada materia. Mientres que col decretu anterior, aprobáu por PSOE y BNG, nes escueles había una presencia d’un mínimu del 50% de les materies en gallegu.
 
El previsible futuru presidente de la RAG, tamién tien una importante obra com articulista nos diarios gallegos y defende la singularidá de la llingua gallega y de la so  normativa frente a les tendencies lusistes qu'existen nel país vecín.
 
Ferrín ye dende los años 80 una de les voces que más tien defendío la galleguidá non solo llingüística sinon nacional de la zona d'Asturies asitiada ente los ríos Navia y Eo, depués de la toma de posesión de Touriño como presidente de la Xunta a la qu’asistió Álvarez Areces escribió; “Lo qu’agora importa ye que la sonrisa d’Areces nun se borre, que siga memorizando’l nuesu himnu y que trate de solucionar con arreglu a lo que ye xustu’l problema llingüísticu del Occidente del Principáu, que faló, fala y falará gallegu”.
 
Del mesmu mou escribió que “la vindicación de la galleguidá de les tierres de la marxe drecha del Eo tamién debe incluir l’espardimientu de fechos como esti; nes Tierres Eo-Navia hai escritores en gallegu y tamién en castellán, pero nun existen escritores en bable, asturlleonés o asturianu”.
 
Y tamién tuvo pallabres pal movimientu de defensa del nuesu país, asina escribió; “l’asturianismu (nun too) trata d’asimilar, en forma de caricatura d’un imperialismu, la gallegofonía de la Tierra eonaviega. Consecuencia: que l’españolismu de drecha y d’esquierda, que ye lo que ta nel so Parlamentu Autonómicu, fai mui poco pola llingua asturiana y perxudica enforma la llingua gallega d’Asturies”.
 
Ta por ver si la RAG, una institución tradicionalmente conservadora y con carís institucional, va camudar la so política sobre Asturies baxo’l mandu de Ferrín. Con Barreiro a la cabeza la RAG yá nomo a Carlos Varela Aenlle como académicu correspondiente pa representar a la zona Navia-Eo.