Esposición de Cómic n’asturianu

Hasta’l próximu 29 de xineru la Sala d’Esposiciones de la Casa de Cultura Marta Portal de Nava acueye la esposición que recopila los meyores trabayos presentaos a la VII Edición del Concurso de Cómic Comarca de la Sidra con guiones escritos n’asturianu.

La esposición ta compuesta de diez de les meyores historietes de la edición 2009, ente les que s’alcuentra, lóxicamente, la obra ganadora titulada “Nel día de la victoria”, del autor mierense José Juan González. Del mesmu mou, el xuráu concedió dos accésit de a la futurista “Creación 3.0”, d’Enrique Carballeira y “Fuñería” del xixonés Diego Bernardo Álvarez, una obra d’ambiente mitolóxicu.
 
El concursu de cómic ta empobináu pola Mancomunidá Comarca de la Sidra cola collaboración de la Conseyería de Cultura y Turismu, l’Institutu Asturianu de Xuventú y el patrociniu de la Obra Social y Cultural de Caxastur.