Fai! agradez les muestres de sofitu tres nun poder celebrar la so asamblea

|

Fai! quier facer llegar el so agradecimientu a los ciudadanos qu'amosaron la so solidaridá tres de l'anulación por l'Alcalde y la Conceyala de Cultura y Muyer d'una asamblea abierta en Posada. Al tiempu, Fai! fixo dos murales, siguiendo cola so actividá en Llanera.

Tres que'l conceyu, gobernáu pol PP, nun permitiera la celebración d'una asamblea abierta na Casa la Cultura, Fai! recibió un bon númberu d'amueses de sofitu de toa mena, “que van dende'l movimientu vecinal, cola Asociación de Vecinos d'Agüera, pasando pel conceyal d'IU na oposición”, señalen.
 
La organización agradez “fondamente” el comunicáu de refuga d’UNA-Mocedá, que “tamién se repitió a nivel personal per parte d'otres persones arreyaes a la esquierda asturiana”.
 
Según Fai!, nun puen dar más que bones pallabres no que cinca al Conseyu de la Mocedá del Principáu, “que vien de pidir una esplicación al conceyu de Llanera y a la so conceyala énte la denuncia pública fecha por una entidá miembru del CMPA y l'esmolecimientu que xeneró esta per parte del so presidente Paulino Feito”.
 
Tamién agradecen l’interés del Aconceyamientu de Xuristes pol Asturianu no que cinca a la discriminación llingüística y “la so predisposición permanente pa denunciar públicamente cualquier represión, mesmo a coleutivos qu'a particulares”.
 
Per último, Fai! anuncia que va siguir trabayando pola defensa de los espacios públicos en Llanera, “cafie a quien cafie”, y pola necesidá d'ufrir soluciones dende postures d'esquierda y soberanistes a los problemes del conceyu.

Contador Estadistiques