Hostelería d'Asturies refuga la prohibición del consumu de tabacu

El presidente d'Hostelería d'Asturies refugó la modificación de l'actual Llei Antitabacu, dao qu'entiende que la imposición de la prohibición total de fumar nos establecimientos hosteleros pue conllevar importantes perdes económiques.

De fechu, José Luis Álvarez Almeida estimó una cayida de les ventes del 7 por cientu en restaurantes, ente'l 10 y el 15 por cientu en bares, y de más del 15 por cientu n'establecimeintos d'ociu nocherniegu. Amás, apuntó les molesties de ruiu na cai que diba orixinar nun poder fumar dientro de los llocales de nueche. "Les empreses d'ociu y turismu tamos en crisis y la prohibición del consumu de tabacu ye otra complicación más", dixo.
  
Álvarez Almeida comentó, en rueda prensa, que los representantes del sector hosteleru español tamién manifestarán güei'l so refugu de manera conxuntu al proyectu ante la "rocea" que xeneraron les declaraciones de la ministra de Sanidá, Trinidad Jiménez.
  
De la mesma manera, aprovechó pa pidir la concreción en feches y conteníu de la reforma, per parte del Ministeriu, y un "posicionamientu claru" de les conseyeríes de Salú y Servicios Sanitarios, y de Cultura y Turismu d'Asturies.
  
El presidente d'Hostelería d'Asturies quixo esclarar que'l sector ta a favor de la proteición de la salú, pero remarcó que'l tabaquismu ye un problema social, que nun pue facese empresarial, y poro debe tratase dende la concienciación y non dende la prohibición. Al mesmu tiempu, señaló qu'esta midida ye "una cortina de fumu" de la crisis y la subida prevista nel IVA.
  
Poro, pidió que se caltenga la vixente Llei Antitabacu, como mal menor, y remarcó que los hosteleros "adautáronse y cumplen" cola llexislación vixente. De la mesma manera, apuntó que la directiva europea ye "una recomendación, non una llei, y poro'l so cumplimientu nun ye una obligatoriu, sinón una decisión de los países". Álvarez Almeida añadió qu'Irlanda ye l'únicu estáu de la UE con prohibición total de fumar n'hostelería y zarraron el 24% de los negocios.  
 
Situación n'Asturies
 
El presidente d'Hostelería d'Asturies indicó que n'Asturies el 95% de los llocales -unos 9.200 establecimientos- son inferiores a 100 metros, y poro los hosteleros deciden si son de fumadores o non. Poro, alvirtió que los "más afeutaos" serán los primeros hosteleros.
  
José Luis Álvarez Almeida señaló qu'unos 500 llocales, de más de 100 metros, realizaron reformes nes sos instalaciones p'adautase a la llei. Asina, considera que "nun yera llóxico" que dempués se-yos aplique la prohibición, anque afirmó que'l sector quier que se regule a tolos llocales pa evitar competencia interna. Amás, calcó en que dalgunos de los bares de menos de 100 metros que se declararon 'llibres de fumu', tiempu dempués permitieron fumar pola demanda de la clientela.
  
Álvarez Almeida pidió una mayor conciencia de la propia sociedá, y reclamó que d'entrar en vixencia la prohibición total, la responsabilidá de fumar nun llocal seya de la ciudadanía non de los establecimientos. "Fumar ye una cuestión cultural sobre la qu'hai que concienciar dende la educación, non cola prohibición", acabó.