Asturies.com TV estrena una serie sobre los instrumentos tradicionales

Asturies.com TV ta acabantes d’estrenar la serie “Instrumentos Tradicionales d’Asturies”. La serie ta fecha en collaboración cola Escuela de Música La Quintana y va constar de siete capítulos. Nésti primeru, David Varela preséntanos l’acordión.

Nos videos van salir maestros de la Escuela de Música Tradicional La Quintana de Xixón. Asina, Borja Baragaño ( DRD, Llangres), David Varela, Merce Santos, Juan José Díaz Guerrero (La Bandina), Moises Suarez y Lisardo Prieto (Felpeyu) van enseñanos daqué sobre gaita, flauta travesera, acordión, zanfona, tambor, guitarra y vigulín.
 
La serie ta dirixida por Javier Lueje, realizador de perconocíos videoclips como "La Saya" de Felpeyu o "Na Caleya" de La Bandina.
 
La Quintana axunta la mayor ufierta d'enseñu del patrimoniu musical asturianu. Gracies a un alcuerdu col equipu direutivu de la Escuela Pública Rei Pelayo de Xixón, la Quintana usa los locales d'esta escuela pa llevar alantre'l so llabor educativu.
 
La xente interesao pue escoyer ente asignatures como asturianada, acordión diatónica, gaita, vigulín tambor, zanfona, bandurria, guitarra, Folclor, llinguaxe musical, baille, percusión, harpa céltica o xiblata travesera.
 
Arriendes del llabor docente, la Escuela La Quintana tamién entama una riestra d'actividaes col envís de sirvir de complementu educativu a les clases, como son Viaxes d'Estudios, Conciertos en conxuntu o Xornaes de convivencia onde los alumnos descubren otros aspectos de la cultura tradicional asturiana distintos a los que tán estudiando.