UNA esixe la conservación del patrimoniu material d’Uviéu

UNA esixe al Conceyu una política de conservación del patrimoniu artístico-cultural d'Uviéu. Del mesmu mou, piden soluciones pal estáu de la panera del Parque d’Iviernu.

Unidá Nacionalista Asturiana critica que'l Conceyu d’Uviéu nun tenga una política de conservación del patrimoniu material del conceyu y esixe una mayor atención pa con tos aquellos elementos histórico-artísticos que “constitúin una parte vital del patrimoniu cultural d’Uviéu”.
 
Pa UNA, resulta hipócrita l’actitú del alcalde solicitando dineru al Gobiernu d’Asturies pal caltenimientu y fomentu del Prerrománicu “cuando'l consistoriu de la capital tampoco nun ye a desendolcar nin tan siquiera una política cultural mínimamente seria que permita  caltener en bones condiciones y fomentar la riqueza cultural de la ciudá”.
 
Nesta llinia, piden la restauración y el cuidáu del estáu de la panera del sieglu XVIII allugada nel Parque d'Iviernu, “que ye maltratada por viandantes que dediquen el so tiempu llibre a facer muezques y escarabayar con pintura un monumentu históricu”, señalen.