El Bloque califica a Belén Fernández como “vocera de los que quieren romper el pautu”

El Bloque amosó’l so refugu al banzáu de Caliao y a la incineradora. Del mesmu mou, señalaron a la Viceconseyera de Mediu Ambiente como vocera de quienes quieren romper el pautu de gobiernu y sumir Asturies na “inestabilidá y la debilidá institucional, en función de los sos intereses personales”.

El Bloque considera l'actitú la Viceconseyera de Mediu Ambiente, Belén Fernández, llamentable y mui dañina, “non namás pal pautu de gobiernu que caltién y da sentíu al executivu al qu’ella pertenez, sinón tamién, pa los intereses de tolos asturianos. Fernández faló nel últimes selmanes la “necesidá” de facer el banzáu de Caliao y la incineradora
 
Esclarien que dicir que "Asturies ye un país que necesita agua" como argumentu respeuto a Caliao, ye un exerciciu de “cinismu insoportable pa una responsable de Mediu Ambiente”. Pal Bloque, los ciudadanos saben que tienen asegurada l’agua con polítiques basaes na racionalidá.
 
No que cinca a la incineradora, “amás del marafundiu económicu que representa esta opción”, recuerden el “fracasu” na política de recoyida selectiva y reciclaxe. Según la organización, faciendo la incineradora búscase “tirar pel camín del medio”, pasando a tener más contaminación. Tamién recuerden que’l proyeutu refugóse en toles comunidaes que tán alredor de la nuestra y afiten la necesidá d’una llei que regule la xestión de les basures.
 
Pal Bloque la incineradora va contra’l reciclaxe porque “cuanta más basura se queme, más negociu hai, más perres se ganen”. Esclarien tamién, que de facese la incineradora, Asturies va convertise “nel fornu onde se queme tola basura del norte del Estáu”, polo que s’entruguen cuála ye la esplicación pa querer facer una incineradora con una capacidá de quemar basura pa una población siete veces más grande que l’asturiana.
 
Sama-Velilla
 
No que cinca a la llinia d'alta tensión Sama-Velilla, el Bloque dixo qu'l Gobiernu d´España, “ufre perres y llanza amenaces col oxetivu de tapar la boca y acabar coles quexes, movilizaciones y protestes que ta xenerando esti proyectu”. La organización entrúgase  cómo un proyeutu empresarial priváu que nun beneficia Asturies y nun respuende a los intereses de los ciudadanos, pue tener tantu interés pal PSOE, “hasta´l puntu de mover tolos filos posibles pa imponelu a los vecinos y vecines afeutaes direutamente y a la gran mayoría de la sociedá”.