Pauline en la Playa presenten discu nuevu cola Bandina como convidaos

Pauline en la Playa presenta en primicia'l so discu nuevu,  “Física del equipaje” nel Teatru Xovellanos de Xixón el próximu domingu 24. El conciertu va cuntar cola collaboración de La Bandina y cola presencia nel escenariu de David Varela en bona parte del conciertu.

Física del equipaje (Siesta Records, 2010) ye'l quintu trabayu discográficu d'esti dúu xixonés que l'añu pasáu celebró los sos 10 años como formación. Un viaxe musical qu'entamó en 1999 col mini C.D  “Nada como el Hogar” (Subterfuge Records, 1999); discu de debú qu'algamó la reconocencia  unánime de crítica y públicu,  asitiando a les hermanes Álvarez como ún de los referentes del pop independiente estatal. Dende'l primer mini C.D, Pauline en la Playa espublizó“Tormenta de Ranas” (Subterfuge Records, 2001); “Termitas y otras cosas” (Subterfuge Records 2003) y “Silabario” (Subterfuge Records, 2006).

En Física del equipaje -discu que va salir en marzu pero que Pauline en la Playa presenten en primicia abriendo'l Festival de la palabra, Pauline en la Playa siguen esplorando nueves sonoridaes. L'acordión diatónica, la sección de vientos, les cuerdes, l'ukelele tan presentes nun discu que delles veces garra ritmu de valls y que  trescurre pel pop, el jazz o'l new-folk.

Na so presentación nel teatru Xovellanos, les hermanes Álvarez van tar acompañaes pol contrabaxista David Casillas, la baterista Eva Toca, el saxofonista Andrés Biribay, l'acordeonista David Varela, una sección de vientos y un tríu de cuerdes.
 
Amás, van cuntar cola participación especial de La Bandina, que tamién participaron nesti últimu trabayu. Esta nun ye la primer collaboración ente les componentes de Pauline en la Playa y La Bandina: nel últimu discu del grupu de Folk, 13, Alicia Álvarez cantaba y ponía-y lletra n'asturianu a ún de los temes, "Valse coxu".