Suburbia espubliza’l primer poemariu d’Iván Cuevas

Suburbia Ediciones ta acabantes d’asoleyar el poemariu “Cácabos d’adoquín” d’Iván Cueva. El llibru  ye la estrena poética del autor xixonés y según indiquen dende la editorial trátase de poesía urbano.

 Reflexón a pie de cai sobre’l poder de la poesía, sobre les lluches y los enfotos nos que’l poema s’implica y sobre les zunes y los ídolos de barru llevantaos pola sociedá post-industrial son dalgunos de los temes que se traten nesti poemariu. En cierta midida, “Cácabos d’adoquín” tien muncho de recapitulación sobre’l valor de cada pallabra nel nuevu mileniu, señalen los editores.
 
En pallabres del historiador Rafael Rodríguez Valdés, autor del prólogu del llibru, lo guapo d’esta obra ye “cómo l’autor recupera los axentes colectivos como materia poético; agora que yá nun se respira’l fumu de les manifestaciones, presta afayase ente pallabres onde vive y se tresmite’l sentir de lo colectivo al encruz d’una voz personal que contién y sostién la fuerza de les que nun se dieron”.