Mikel González (Avilés, 1981), ye ún de los  fundadores de Softastur, coleutivu que puxa pol software llibre n’asturianu. Tamién tien ún de los blogues con más renome de la blogosfera y trabaya cada día ensanchando'l requexu del nuesu idioma na rede global.

Asturies.com faló con él sobre’l trabayu de llevar la llingua a les nueves tecnoloxíes.

¿Ye la rede una de les estayes onde la llingua ta más normalizada?

Cuido que la rede nun ye más que'l reflexu de la sociedá. Eso si, ensin pasar pela censura que se ve na prensa escrita o na televisión.

¿Pienses que la comunidá asturfalante aceptó les propuestes terminolóxiques de l’Academia?

Nun tengo nin conocimientos nin capacidá pa discutir temes llingüísticos. Yo sigo falando como siempres y escribo, o lo intento, coles normes. L'Academia ye una institución pola que siento muncho respeto pol llabor que fai, y más teniendo en cuenta les condiciones en que lo fai, pa encima siempre que-yos plantegues duldes o suxerencies tan ehí p'aidate. Los asturianos somos unos privilexaos nesti tema.

¿Cómo ye'l procesu d'adaptar los términos de les nueves tecnoloxíes al asturianu?

Realmente agora nun hai tantu trabayu, porque tolo básicu yá ta estandarizáu, pero cuando surde dalguna dulda, proponémosla nun sistema internu d'alderique col que cuenta Softastur, onde cada traductor pue amestar delles opciones pa un términu n'inglés y van votándose. La que más votos consigue ye la que pasa a un llistáu de términos que depués presentamos a l'Academia pa la so revisión. Nesti procesu buscamos tamién que cada términu n'inglés tenga un términu n'asturianu propiu, pa facilitar l'usu del Software y evitar significaos dobles. Y en dalgunos casos usamos sinónimos y anglicismos mui estendíos, como ye’l casu de "Nucleu" y "Kernel"

¿Cuánta xente trabaya en Softastur y como desendolcáis el trabayu?

En total andamos ente diez y quince persones, sicasí podríemos falar d'un nucleu más activu d'unos siete. Intentamos organizar los proyeutos por coordinadores, qu'amás de traducir encárguense de xeres alministratives como'l rexistru de proyeutos y l'unvio de ficheros. Otros nun traducimos tanto como deberíemos pero dedicamos tiempu a mantener los sirvidores operativos y a programar aplicaciones que faciliten el trabayu. Tamién hai xente trabayando enforma en documentación, y preparando charres y cursos formativos, somos pocos pero mui necios y al final vamos sacando'l trabayu.

¿En que proyeutos trabayáis anguaño en Softastur?

Pues siguimos colo más importante pa Softastur, que ye traducir Software Llibre al asturianu y promover el so usu en tolos ámbitos de la sociedá. Sicasí, empezamos a tener tiempu pa facer más coses, como Ximiélgame, que surde pola falta de redes sociales n'asturianu, sacante los blogues y esbilla.net, pero nada al estilu de twitter o Facebook. Pa encima estes plataformes son privatives y por eso peligroses, nun sabes como trabayen colos tos datos. Ximiélgame yá ye una rede social n'asturianu y ye Software Llibre. Precisamente esti pasáu sábadu entamamos a unviar les primeres invitaciones esternes a Softastur.

¿Ta teniendo ésitu tol trabayu desendolcáu?

Cuido que sí, nun tengo los datos a mano pero l'usu de les aplicaciones n'asturianu nes estadístiques d'Ubuntu medra con cada versión nueva. Pero tampoco ye mui difícil tener ésitu ensin competencia. Amás, l'ésitu de Softastur pue valorase nel trabayu fechu, qu'ehí ta y ye d'accesu y distribución pública pal beneficiu de toos.

¿Cómo ves el mundu de la blogosfera n’asturianu?

Pa min ye una ferramienta mui prestosa pa comunicame con xente colos mesmos intereses que yo y pa facer el friki, que me presta pola vida. Sigue falándose de la oficialidá y de les coses que nos afeuten, anque tamién se fala de cerveza, d'otakus, de como facer un túnel ssh, o de lo que de verdá importa na rede, que ye’l porno. La blogosfera asturiana anguaño ye tan grande que yá nun nos conocemos toos como pasaba fai unos años y eso ye lo meyor que podía pasar.

¿Cómo ves el furrulamientu de la Uquipedia?, ¿ye una hermana menor d’otres wikipedies?

Softastur tien bastante culpa del parón d'Uiquipedia y ye que munchos de los Uiquipedistes más activos agora dediquen más esfuerzos a traducir Software Llibre. En cuantes a la dependencia con otres versiones nun ye tala. Por exemplu, basta con mirar historiales, dalgunos artículos de la Uiqui pasaron a otres versiones onde nun esistíen, y non necesariamente temes locales. Lo qu'hai que ser ye realistes y nun podemos comparar el trabayu d'una decena de collaboradores col de miles.

Tamién entamasti al traviés de youtube una campaña de promoción de la campaña “Doilacara”, ¿tuvieron ésitu estos videos?, ¿ta representáu l’asturianu en youtube?

¿Campaña? mamina nun m'asustes, son frikaes que faciemos pa pasar el ratu, por que nos prestaba. Equí'l méritu ye del CAO que llanzó una campaña bien prestosa, nós simplemente esfrutamos con ella. En cuantes a la representación del asturianu en youtube, cuido que sí tien una representación, pero como cualesquier otra llingua col mesmu númberu de falantes.

¿Qué te paez la nueva llexislación sobre drechos d’autor n’internet?

La llexislación nun cambia, lo que cambia ye que les xestores de drechos d'autor quieren saltase la molestia de pasar por un xuez pa zarrar webs. Ellos dicen que namás que les qu'incumplan drechos d'autor, pero si yo pongo nel blogue una opinión que nun-y siente bien al sociu de turnu zarren la mio web y yo tengo que demostrar que soi inocente y non al revés. Agora intenten facelo con xuicios rápidos. Este nun ye un problema nin d'internet, nin de les redes sociales, nin de los músicos, ye un problema de los señores que fabriquen discos. Pero esi ye'l so problema non el nuesu, yo nun veo llorar a los fabricantes de películes fotográfiques.
 
Reportaxe d'Asturies.com TV sobre Softastur