UNA quier que l'Ayuntamientu esplique l'esbarrumbe de la Cai los Moros

UNA solicita al Ayuntamientu de Xixón qu'esplique les causes del esbarrumbe del edificiu de la Cai los Moros y les midíes preventives adoptaes. Pa la vocera de la organización en Xixón, Yolanda González, la Conceyalía d'Urbanismu disponía d'información abondo pa evitalo.

Pa la organización, se podién adoptar midíes tendentes a evitar l'esbarrumbe, yá que “esistía una petición de declaración de ruina, lo que tendría que llevar apareyáu un estudiu de la situación del edificiu que detectara'l riesgu d'esbarrumbe” ya inclusive fala d'intervenciones recientes sobre l'edificiu por cuenta del so estáu.
 
A xuiciu de la vocera “nun podemos considerar abondo la xustificación de que taba en marcha un espediente pola mala situación de la fachada, nin tampoco cabo achacar l'esbarrumbe única y puramente al mal tiempu” y ello porque “si l'edificiu, como paez, taba nun estáu tan llaceriosu y nel Ayuntamientu yá había antecedentes sobre'l mesmu, hubiere o non declaración de ruina, debieron dictase órdenes d'execución que siquier, obligaren a l'adopción d'unes mínimes midíes de seguridá”.
 
González insistió en reclamar que “s'esplique con claridá lo que, realmente asocedió, pa evitar que vuelva pasar y aselar a la ciudadanía en rellación col control del estáu de los inmueble de la ciudá”.