Primer selmana de prebes en Ximiélgame

|

Yá son 25 los perfiles abiertos na primer selmana de Ximiélgame, la nueva rede social n’asturianu. Pa ún de los sos responsables, Mikel González, el so furrulamientu va bastante bien, anque tovía nun tienen una fecha afitada p'abrilo al públicu en xeneral. Pel momentu namás tán usándolo los blogueros que yá votaron pol “meyor blogue 2009”.

Según Mikel González, paez que los usuarios que tán probándolo tán contentos, “anque tamién hai de tener en cuenta que son xente con una predisposición especial y mui voluntariosa qu'aiden un montón, presta trabayar asina la verdá”.
 
Tovía nun saben cuando tará abiertu a tol públicu, dependerá principalmente del desendolcu de dos funcionalidaes: la integración con Facebook, que ta bastante avanzao, y un preseo nuevu pa permitir a los usuarios xubir semeyes y ordenales n'álbumes, señalen.
 
Según González hai que tener en cuenta que la xente que desendolca Ximiélgame ta faciéndolo nel tiempu llibre, “por eso igual podemos tar una selmana ensin grandes avances y nun par de díes inspiraos sacar funcionalidaes nueves”.
 
Sicasí, esclarien que nun van esperar a tener tol sistema completu p'abrir el rexistru, “anque si unos mínimos, porque la idea ye que nunca va tar completu, pretendemos dir amestando preseos y funciones nueves pocu a pocu”.
 
Pel momentu cuenten con serviciu de microbloging (nomáu "El telégrafu"), un sistema pa guardar enllaces na cuenta del usuariu (como los marcadores d'un restolador pero online), una especie de "muru" asemeyáu al de Facebook y tamién hai un sistema de mensaxería interna.

Contador Estadistiques