L'alcalde lleonés nun acepta "proyeutos por dineru"

L'alcalde de Lleón aseguró que nun acepten proyeutos por "imposiciones o dineru" tres les declaraciones de Manuel Chaves, nes que señaló que l'Executivu central estudia ofrecer compensaciones p'algamar la llinia d'alta tensión Sama-Velilla.

Na opinión de l'alcalde lleonés, Francisco Fernández (PSOE),, diches palabres son "inapropiaes", dao que falar de compensaciones ye "llóxico" cuando se trata d'una iniciativa beneficiosa, pero "nunca pa pagar un perxuiciu".
  
Nesti sen, recalcó qu'hasta'l momentu naide convenció a la sociedá lleonesa de que la execución de la llinia d'alta tensión Sama-Velilla seya beneficiosa pa Lleón nin pal restu de territorios pelos que pasa'l so trazáu.
  
De la mesma manera, aseguró que los representantes socialistes de Lleón caltendrán la so postura a la escontra de la execución del proyectu, asina como la reivindicación de la retirada del mesmu. "Apoyamos la non construcción de la llinia d'alta tensión", sorrayó.
 
Abiertu a dialogu
 
Sicasí, matizó qu'esta postura nun quieren dicir que se zarren les puertes al diálogu nel casu de que dalguna persona pudiere demostrar que la iniciativa seya beneficiosa.
  
Al marxe d'esta cuestión, Francisco Fernández tuvo palabres pal "llau positivu" del conceyu calteníu ayeri ente Chaves y el presidente d'Asturies, Vicente Álvarez Areces, un alcuentru tres el que'l responsable del Executivu central recalcó nel compromisu de Zapatero de trabayar pola prollongación de les ayudes al carbón demientres la presidencia de la UE en pasando'l 2013.
  
La consecución d'esti oxetivu, según destacó'l rexidor lleonés, favorecería al sector mineru en Lleón y Asturies, motivu pol que les palabres de Chaves nesti sen resulten "tranquilizadores".