El diariu Público llega a un prealcuerdu pa comprar La Voz de Asturias

Mediapubli, editora del diariu Público, del grupu Mediapro, llegó a un prealcuerdu pa la compra del periódicu La Voz de Asturias, del Grupo Zeta, según confirmaron a Europa Press fontes de la cabecera que dirixe Félix Monteira.

El prealcuerdu deberá materializase antes del 28 de febreru y yá se comunicó a la plantiya de La Voz de Asturias. Sicasí, les mesmes fontes esplicaron que "tovía nun hai un alcuerdu definitivu porque falten coses por amarrar". De fechu, ambes partes siguen negociando sobre la cuantía económica de la operación.
 
Les condiciones pactaes impliquen la realización d'un Espediente de Regulación d'Emplegu (ERE) nel rotativu uvieín qu'afectará al 60 por cientu de la plantiya, sobre 40 trabayadores. El diariu rexistró unes perdes nel exerciciu del 2009 de sobre 1,5 millones, según l'Asociación de la Prensa de Madrid.
  
De completase a lo último la operación, La Voz de Asturias venderíase conxuntamente con Público, lo que respuende a la voluntá d'espansión del grupu de Jaime Roures. El periódicu asturianu fundóse en 1923 y nel añu 1986 incorporóse a la cadena de rotativos rexonales del Grupo Zeta.