UNA califica de pésima la xestión de los astilleros

La portavoz d’UNA en Xixón, Yolanda González, considera que’l llaudu arbitral qu’obliga a Vulcano a pagar más de 32 millones d’euros pol incumplimientu d’un contratu “nun ye otru qu’una muestra más de la pésima xestión de los astilleros”.

 La organización ve inalmisible la participación de Pymar en tou esti procesu, “con un únicu envís, el pieslle de Juliana, que va costar más de 32 millones d’euros a les arques públiques”.
 
Yolanda González declaró que “cada día ye más evidente que la xestión que se vien faciendo dende hai años ye absolutamente nefasta, entamando pela propia escoyeta de la empresa Vulcano, que nun foi la más amañosa” daqué que “el tiempu, que tolo pon nel so llugar, amosó d’una manera nidia”.
 
Yolanda González cuida que toles alministraciones públiques implicaes “débennos a los ciudadanos 32 millones d’esplicaciones sobre esti escándalu, qu’amuesen una vegada más cómo los nuestros responsables políticos nun tomen los determinos teniendo en cuenta los nuestros intereses”.