El gobiernu central quier algamar el consensu pa Lada-Velilla

El vicesecretariu terceru y ministru de Política Territorial, Manuel Chaves, refirióse n'Uviéu al proyeutu de la llinia Sama-Velilla y aseguró que'l Gobiernu central apoya'l proyeutu, pero trabaya p'algamar el consensu ente comunidaes.

"Vamos trabayar p'algamar el cosnesu y si al mesmu tien que llegase al traviés de compensaciones pa solucionar los problemes que puean apaecer dende'l puntu de vista medioambiental o de proteición del territoriu nosotros trabayaremos nesa llinia", dixo Chávez, qu'indicó que l'actitú del Gobiernu con esi problema ye clara.
  
Chavez indicó qu'esta rede nun ye sólo un problema d'Asturies, dao que se trata d'una cuestión qu'afecta al conxuntu del territoriu estatal. "Nun se trata sólo de producción sinón también de distribución enerxética", dixo Manuel Chaves.
  
El vicepresidente terceru manifestábase asina demientres la rueda prensa ofrecida tres caltener un conceyu col xefe del Executivu asturianu, Vicente Álvarez Areces.
  
Manuel Chaves manifestó que les posibles compensaciones son sólo una de les posibilidaes pa llograr un consensu, y añadió que nun ye la primer vez qu'usa esti tipu de solución pa sacar alantre una obra que se considera importante. "Yo planteguélo como una posibilidá que pue utilizase a la hora d'algamar el consensu ente les comunidaes autónomes", dixo.
 
Ayudes al carbón
  
Otru de los problemes trataos por Chaves y Areces demientres el conceyu de trabayu foi'l futuru de les ayudes al carbón. Nesti sen Chaves calcó nel compromisu de Zapatero y aseguró que l'oxetivu pasa per trabayar demientres la presidencia española de la UE col restu de países, fundamentalmente Alemaña, pa llograr que cuando acabe la vixencia del actual reglamentu puea desarrollase la "prollongación del mesmu" que necesite'l sector mineru d'Asturies.
  
Pela so parte, el presidente d'Asturies, Vicente Álvarez Areces, agradeció la "sensibilidá" mostrada pol vicepresidente terceru colos problemes d'Asturies y destacó que los que se-y plantegaron na so anterior visita a Asturies fueron resueltos con satisfaición pa los asturianos.
  
Nesti sen, refirióse a los problemes de financiación de les obres d'ampliación d'El Musel y a la negociación del nuevu modelu de financiación autonómica y recordó qu'ambes cuestiones tán yá resueltes.