Begoña Serrano nueva direutora de la Axencia Asturiana d'Emigración

El Conseyu de Gobiernu del Principáu aprobó güei'l cese "a pidimientu propiu" de la direutora de l'Axencia Asturiana d'Emigración, Ana Rivas, y el nomamientu como responsable d'esti departamentu de María Consolación Begoña Serrano Ortega.

Según indicó l'Executivu nuna nota prensa, el Conseyu de Gobiernu agradez los servicios prestaos pola direutora cesante, Ana Rivas.
 
Begoña Serrano ye llicenciada en Filosofía y Lletres pola Universidá d'Uviéu, y entamó la so trayectoria profesional na Cátedra de Jovellanos d'Estensión Universitaria de la Universidá d'Uviéu.
 
En 1990 asumió la responsabilidá del archivu de la Fundación 'José Barreiro' y nel 2004 pasó a formar parte del Gabinete de la Conseyería de Presidencia, agregada al Conseyu de Comunidades Asturianes, puestu que desarrollaba hasta agora.