Los bolos asturianos dan la cara pola oficialidá

Los xugadores de bolos Iván Fernández y Bernardo Menéndez, amás del aficionáu y ex sportinguista, “Cundi”, sumáronse a la campaña “Doi la cara” del Conceyu Abiertu pola Oficialidá.

Los retratos foron tomaes el pasáu 28 de payares en La Pola Siero, mientres la celebración del CAO poles 10.000 semeyes. Ún de los actos empobinaos pal festexu foi’l I Tornéu pola Oficialidá. Nel qu’amás de los citaos, participaron otros deportistes como’l ciclista Chechu Rubiera.

Iván Fernández, ye ún de los xugadores que meyores resultaos algamó na temporada de bolos del añu 2009 na modalidá de cuatriada. Xugador de la Peña Prau La Güeria de Llaviana. L’añu pasáu ganó Tornéu de la Balesquida, llegando a les finales del Campeonatu del Millón; Tornéu Recluta, Tornéu Conceyu de Llanes y Tornéu d'Inauguración de la Bolera de La Pola Siero. Foi’l ganador del I Tornéu de Bolos pola Oficialidá faciendo pareya con Secundino Suárez "Cundi”.

Bernardo Menéndez ye xugador de la Peña Villa de Noreña. Consideráu ún de los meyores xugadores de bolos de la historia, l’añu pasáu ganó prauticamente tolo que xugó: Campeón del Mundialito; Campeonatu d'Asturies de 1ª; Tornéu L'Abuelo (Siero); Tornéu d'inauguración de la Bolera de La Pola Siero; Tornéu Magdalena; Bolos na cai de Ribeseya; Bolos na cai de Villaviciosa; Tornéu Cuerín (Centru Asturianu d'Uviéu), Tornéu Centru Comercial Los Prados; Tornéu Recluta y Tornéu Conceyu de Llanes. Nel tornéu empobináu pol CAO, quedó segundu faciendo pareya col ciclista Chechu Rubiera.
 
Mientres, Secundino Suárez "Cundi" ye un aficionáu a los bolos na especialidá de cuatriada. Foi xugador del Sporting de Xixón y de la selección de la Federación Española de Fútbol nos años 70 y 80. Algamó"I troféu del tornéu faciendo pareya con Iván.
 
Estes tres semeyes súmense a les otres 10.038 que yá tan na galería que’l Conceyu Abiertu pola Oficialidá tien en flickr.