Zelaya refuga l'amnistía pa los implicaos nel golpe d'Estáu

|

El presidente depuestu d'Hondures, Manuel Zelaya, refugó la Llei d'Amnistía que pretende aprobar mañana'l Congresu y de la que podríen beneficiase los afaladores del golpe d'Estáu del 28 de xunu del añu pasáu.

"El golpe nun quedará impune, nin se pue tapecer", sorrayó Zelaya en declaraciones a l'axencia Prensa Llatina. Nesti sen, indicó que nun se puen olvidar les violaciones de Drechos Humanos, les detenciones illegales y otros delitos cometíos dende la so espulsión del poder.
  
El Congresu Nacional discutirá güei martes el decretu pa garantizar l'amnistía política n'Hondures, que s'aplicaría a delitos como traición a la patria, sedición, contra la forma de Gobiernu, terrorismu, violencia, vandalismu y abusu d'autoridá. La midida beneficiaría a ambes partes y podría significar tamién la salida de Zelaya de la Embaxada de Brasil en Tegucigalpa, onde permanez refuxáu dende últimos de setiembre, cuando tornó callandinu al país centroamericanu
  
Zelaya criticó al presidente eleutu, Porfirio Lobo, por promover el perdón pa los responsables del golpe. Ente otres razones, Lobo entiende que l'amnistía "agradará a la comunidá internacional" y "va trayer la paz a Hondures".

Contador Estadistiques