L'ex direutor xeneral de Vivienda énte'l xuez polos minipisos de La Llaboral

L'ex direutor xeneral de Vivienda y actual direutor xeneral de la Zalia, Enrique Álvarez, declarará mañana énte'l maxistráu del Xulgáu d'Instrucción númberu 2 d'Uviéu, Ángel Sorando,  pola denuncia del PP sobre l'axudicación del proyeutu de minipisos pa mozos na Llaboral.

Pela so parte, el miércoles, 13 de xineru deberá comparecer énte'l xuez, tamién como acusáu, el direutor xeneral d'Ordenación del Territoriu y Urbanismu, Guillermo Morales, según informaron fontes xurídiques a Europa Press.

El PP presentó una denuncia contra l'anterior Conseyu d'Alministraciones de Vipasa por "falsedá documental, prevaricación, sobornu, tráficu d'influencies, malversación de caudales públicos, fraudes y cobros illegales".
  
La denuncia arguméntase nes supuestes irregularidaes alcontraes pol diputáu popular José Agustín Cuervas-Mons nel espediente de l'axudicación del proyectu de los minipisos que-y remitió Vipasa.
  
Según el PP, el contratu axudicóse "a deu" a un despachu d'arquitectos madrilanu (Díaz y Rojo) y por un montante superior al autorizáu pol conseyu d'alministración de Vipasa. Amás, otorgóse once meses antes de que nel rexistru de Vipasa conocieren cuáles yeren les ufiertes. De la mesma manera, los populares denuncien que la operación superó en 61.000 euros la cantidá de 320.000 aprobada nel so día pola empresa.