CC.OO reclama al Principáu meyores na Senda l'Osu

La Unión Comarcal de CC.OO únese a la demanda de los alcaldes de la zona y reclamó al Gobiernu d'Asturies pa la Senda l'Osu l'atención debida, al considerar que nestos "difíciles" momentos deben cuidase y potenciar los elementos de la Senda.

Al traviés d'un comunicáu, la organización sindical recordó que dende qu'en 1995 s'inaugurará la Senda l'Osu, ésta foi ganando relevancia turística a la par que se foi deteriorando progresivamente por falta de conservación.

"En cuanto al so grau de notoriedá y al so cáracter de reclamu turísticu, baste dicir que Google devuelve 161.000 entraes, les más de les cuales son páxines de conteníu turísticu", destacó CC.OO. Del mesmu mou, señaló que la Senda tien que ser pa cualquier gobiernu d'Asturies "un elementu estratéxicu de cara al futuru".
  
De la mesma manera, recordó que del deterioru que presenta yá alvirtieron los alcaldes de la zona nel 2005 cuando se produxo aquel desgraciáu accidente d'un ciclista, con resultáu de muerte, y destacó que naquella ocasión, el TSXA dictaminó que los responsables titulares de la Senda yeren los conceyos de la Mancomunidá y desimió de responsabilidá civil a Asturies.
  
Pa CC.OO tal circunstancia paez dar pie al gobiernu autonómicu a dexar a los conceyos el llabor de la conservación de la Senda l'Osu, dalgo de lo que se quexen los distintos alcaldes de los valles del Trubia, qu'afirmen qu'ellos colos sos medios escasos nun se puen encargar de la conservación de los más de 40 kilómetros de senda y hasta alvierten de la posibilidá de tener que zarrar l'accesu, pol deterioru y la peligrosidá actuales.
  
CC.OO recuerda que la mayoría d'esos alcaldes, incluyíu'l presidente de la Mancomunidá, pertenecen al PSOE, polo que l'asuntu paez alloñáu de les rivalidaes polítiques. Asina, indicó qu'esta infraestructura constituyó nel so día parte de l'apuesta por un modelu verde y de turismu paisaxísticu p'Asturies, promovíu dende'l Gobiernu d'Asturies y poro nun pue agora evitase la so implicación directa y decidida con un recursu que ye de los pocos colos que cuenta la comarca pa la so sobrevivencia.