El Bloque diz que l’Ayuntamientu de Llaviana nun ta faciendo nada por esclariar la muerte de truches nel Nalón

El Bloque por Asturies camienta que l’Alcalde de Llaviana, Adrián Barbón, y el propiu Ayuntamientu nun fixeron un res por esclariar la muerte de truches nel ríu Nalón, tres qu’esti branu pasáu, a l’altura de Puertu l’Arcu, un vertíu provocara los fechos. Pal Bloque, l’Ayuntamientu nun ta actuando contra los responsables de los vertíos.

Según señalen dende la organización, l’Ayuntamientu de Llaviana nun presentó denuncia nenguna nin énte’l Seprona, nin énte la Confederación Hidrográfica, nin énte la Fiscalía de Mediu Ambiente, nin énte’l Xuzgáu de Llaviana, “ello a pesar de la gravedá de los fechos”.
 
El Bloque diz que por esa falta d'actuaciones, “paez desconocer que nel Xuzgáu de Llaviana hai abiertes dilixencies pa esclariar les posibles responsabilidaes penales, nes qu’una organización modesta, como la nuestra y previa denuncia énte’l Xuzgáu, ta personada”.
 
La organización diz tar d’alcuerdu col Alcalde na gravedá de los fechos, “pero esto nun cuadra coles aiciones feches”, señalen.